ՀՀ սպորտի եւ երիտասարդության հարցերի նախարարության նախաձեռնությամբ, ՅՈՒՆԵՍԿՕ-ի դրամաշնորհի շրջանակներում Երեւանում կայացավ հակադոպինգային հարցերի վերաբերյալ ուսուցողական սեմինար «Մրցել ազնիվ» խորագրով:
Հայաստանի հակադոպինգային ծառայության հրավերով Հայաստան ժամանած Ըմբշամարտի միջազգային ֆեդերացիայի (UWW) հակադոպինգային հարցերի պատասխանատու Կառլոս Ռոուն Հայաստանի մարզիչներին եւ մարզիկներին ներկայացրեց 2018 թ. UWW-ի արգելված նյութերի ցուցակը եւ դրանք օգտագործելու դեպքում կիրառվելիք պատժամիջոցները:
ՀՀ սպորտի եւ երիտասարդության հարցերի փոխնախարար Գաբրիել Ղազարյանը կարեւորեց նման սեմինարների անցկացումը.
«Մենք հետեւողական պայքար ենք մղում այդ չարիքի դեմ: Այսպիսի ուսուցողական միջոցառումների, որ կազմակերպում է նախարարությունը, նպատակը ազգային հակադոպինգային կրթական ծրագրերի արդյունավետությունը բարձրացնելն է»,- նշեց Գաբրիել Ղազարյանը:
«Դոպինգի դեմ պայքարն ըմբշամարտի միջազգային ֆեդերացիայի գլխավոր ուղղություններից մեկն է: Ես եկել եմ Հայաստան՝ ներկայացնելու հակադոպինգային քաղաքականության նոր հիմնական տարրերն ու կատարված փոփոխությունները: ՄՕԿ-ը շատ մեծ ուշադրություն է դարձնում, թե որքանով են մաքուր մարզաձեւերը: Դոպինգի օգտագործումը սպառնում է ամբողջ սպորտին»,- ասաց Կառլոս Ռոուն՝ տեղեկացնելով, որ դոպինգ օգտագործելու դեպքում տվյալ ազգային ֆեդերացիան ենթարկվելու է դրամական տույժի (20 հազար շվեյցարական ֆրանկ), իսկ մարզիկի որակազրկման չափը կախված է լինելու արգելված նյութի տեսակից եւ քանակից.
«Դոպինգի օգտագործման կանխումը միայն ստուգելը եւ որակազրկելը չէ: Պետք է մարզիկներին ու մարզիչներին ուսուցանել դրանց վնասակար հատկությունները: Հատկապես այս տարածաշրջանում, որտեղ ըմբշամարտը գլխավոր մարզաձեւերից է եւ կան օլիմպիական խաղերի, աշխարհի ու Եվրոպայի չեմպիոններ»,- ասաց Ռոուն:
Անցած տարի դոպինգ թեստերի դրական դեպքերով ըմբիշները գրավել են առաջին տեղն աշխարհում: Հայաստանի հակադոպինգային ծառայության պետ Արեգ Հովհաննիսյանի խոսքով, դա կապված է մելդրոնատի օգտագործման հետ: Ըմբշամարտում այն շատ օգտակար դեղամիջոց է համարվել:
Վաղը հակադոպինգային հարցերի վերաբերյալ ուսուցողական սեմինարը կանցկացվի Գյումրիում, որից հետո՝ Թբիլիսիում:
Աշոտ ՀԱԿՈԲՅԱՆ
