Աճառյանի անվ. Լեզվի ինստիտուտի տնօրեն Վիկտոր Կատվալյանը եւ ԵՊՀ Հայոց լեզվի ամբիոնի դոցենտ Աշոտ Տեր-Մինասյանը մտահոգված են հայոց լեզվի նահանջից:
Հոկտեմբերի 11-ին ՄԱԱ-ում խոսելով լեզվաքաղաքականության թեմայով, պարոն Կատվալյանը շեշտեց, որ լեզվի կորուստը համարժեք է պետականության կորստին, իսկ նահանջը լեզվական սահմաններից, նահանջ է պետական սահմաններից: «Ցավալի է, երբ հզորները մեզ պարտադրում են իրենց լեզուն ու մշակույթը, իրենք դա նորմալ են ընկալում, իսկ երբ փոքրերս ընդդիմանում ենք, փորձում ենք պահպանել մեր ինքնությունը, զարմանում են»:
Լեզվի ինստիտուտի տնօրենը կարեւորեց Լեզվի պետական տեսչության դերակատարությունը լեզվաքաղաքականության մշակման գործում, այն էլ, ցավոք լուծարվել է: Ինչ վերաբերում է իրենց ինստիտուտին, նշեց, որ դա ինստիտուտի լիազորություններից դուրս է: Նաեւ հավելեց, որ Աճառյանի անվան լեզվի ինստիտուտում գիտությունների դոկտոր, պրոֆեսոր մարդիկ ընդամենը 60000-65000 դրամ աշխատավարձ են ստանում:
Պատասխանելով լրագրողներից մեկի հարցին, թե ինչու վերջին շրջանում հայերենի բացատրական բառարաններ չեն հրատարակվում, պարոն Կատվալյանն ասաց, որ ԵՊՀ-ն պատրաստել է նման մի բառարան, սակայն միջոցներ չկան այն հրատարակելու համար:
Աշոտ Տեր-Մինասյանը ահազանգեց. «Թեեւ ԽՍՀՄ-ի տարիներին էլ ռուսական դպրոցների թիվն աճում էր թարախապալարների նման, սակայն, այն ժամանակ հայկական դպրոցների աշակերտներն ավելի լավ հայերեն գիտեին, քան հիմա»:
ԵՊՀ դոցենտը նաեւ փաստում է` հայ բանասիրության ֆակուլտետի ուսանողների, թերեւս 25%-ը կատարյալ հայերեն գիտի:
Գոհար ՀԱԿՈԲՅԱՆ
