Հոկտեմբերի 11-ին լեզվաքաղաքականության եւ հայոց լեզվի մարտահրավերների թեմայով Մամուլի ազգային ակումբում կայացած քննարկման ժամանակ կրթության փորձագետ Անահիտ Բախշյանը նշեց, որ չի դադարելու խոսել մայրենի լեզվի վտանգված լինելուց, քանի դեռ պետական մակարդակով շեշտադրվում է ռուսաց լեզվի հատուկ կարգավիճակի հարցը:
Նա նաեւ մի օրինակ բերեց. «Մայակովսկու դպրոցի տնօրենը դպրոցի կայքէջում շեշտել է, որ ինքը ռուսական դպրոցի տնօրեն է, իսկ քաղաքապետարանից իմ հարցմանը պարզաբանել են, թե իբր դա աշխատակցի վրիպումն է: Բնականաբար, նման տնօրենի համար հայերենն ավելի ցածր կարգավիճակում է, քան ռուսերենը»:
Տիկին Բախշյանը մեկ այլ վտանգավոր միտում էլ է տեսնում. «Հայաստանի Հանրապետության քաղաքացիները փնտրում են ռուսական անձնագրերով խնամակալներ, որպեսզի կարողանան թույլտվություն ստանալ իրենց երեխաների` ռուսական դպրոցներում սովորելու համար»: Կրթության փորձագետի տվյալներով, նման ցանկություն ունեցողների ամենամեծ թիվը Մայակովսկու դպրոցում է` 28 հոգի:
Ինչ վերաբերում է ռուսաց լեզվի դասավանդման հայեցակարգին, Անահիտ Բախշյանի փաստմամբ, 75%-ը առցանց դեմ է քվեարկել դրան, սակայն, իր ձեւակերպմամբ, այդ մասին ԿԳ նախարարը լռում է:
Գոհար ՀԱԿՈԲՅԱՆ
