«Ամոթ է, որ վաստակաշատ մարդիկ կոչում ստանան Երեւան քաղաքը քանդող քաղաքապետ Տարոն Մարգարյանի ձեռքից». Ավագանու անդամ
Այսօր Երեւանի ավագանու նիստը ընթացավ բուռն կրքերի դրսեւորմամբ: Ավագանու ՀՀԿ-ական անդամներն այս նիստին էլ էին անհանդուրժող ու վիրավորական արտահայտություններով արձագանքում ավագանու ընդդիմադիր խմբակցությունների անդամներին:
Երբ «Երկիր Ծիրանի» խմբակցության անդամին ձայն տրվեց, վերջինս քննադատական ելույթ ունեցավ՝ նշելով, որ ավագանու նիստը մշակույթի երեկո չէ. «Այստեղ գեղեցիկ հայերեն նախադասություններ ասելով չէ, որ գործը առաջ տանեք, բոլորն իրավունք ունեն իրենց կարծիքն արտահատել»:
Նա նաեւ անդրադառնալով պատվավոր քաղաքացիների կոչում շնորհելու հարցին՝ ասաց. «Մեր հանրապետությունում բազմաթիվ կոչումներ, մեդալներ եւ այլն, դրանք արդեն արժեզրկվել են, որովհետեւ տրվում են պատեհ, անպատեհ եւ այն մարդկանց կողմից, որոնք քանդում են մեր քաղաքը, մեր երկիրը: Ես համարում եմ, որ ամոթ է, որ նման վաստակաշատ մարդիկ, այդ թվում նաեւ Ռալֆ Յիրիկյանը, նմանատիպ պարգեւ, նմանատիպ կոչում ստանա Երեւան քաղաքը քանդող քաղաքապետ Տարոն Մարգարյանի ձեռքից»:
Ելույթը լսելուց հետո Երեւանի փոխքաղաքապետը զայրացավ ու ասաց. «Ահ, դե վեր ընգի տեղդ, տո»:
Ավագանու այլ անդամներից մեկի կողմից էլ լսելի եղավ նաեւ «դեբիլ» արտահայտությունը:
Արփինե ՍԻՄՈՆՅԱՆ
