Խորհրդարանում «Զինապարտության եւ զինվորական ծառայության մասին» օրենսդրական նոր կարգավորումների մասին խորհրդարանական լսումներ են:
«Ելք» խմբակցության պատգամավոր Սասուն Միքայելյանը պաշտպանության նախարար Վիգեն Սարգսյանին հարցրեց՝ «Ինչքանո՞վ է ճիշտ, որ սպայական կազմն իրավունք ունի զբաղվել բիզնեսով: Ինչքանո՞վ է ճիշտ բիզնեսը կապել բանակին, հատկապես՝ գյուղատնտեսական ոլորտում, ո՞նց եք պատկերացնում սահմանամերձ համայնքում սպայական կազմը բիզնես անի: Մասնագետների հետ կապված գիտենք, որ բանակում պակաս ունենք եւ իրենց ֆինանսավորման հարցը ի՞նչ ձեւով կարելի է խրախուսել, որ բանակում մասնագետներ ընդգրկենք, թեկուզ՝ արտերկրից, դրսից հարգված մասնագետների բերենք: Պահեստազորի հետ կապված, գիտեք, որ զինծառայողները չեն հերիքում եւ պահեստազորին պետք է ուշադրություն դարձվի: Պահեստազորը պետք է առաջին հրահանգի դեպքում իմանա, թե որ զորամաս պետք է գնա, ապրիլյան պատերազմում մի քիչ խառը իրավիճակ էր: Ես առաջարկում եմ, որ վարժություն անեն, որ տրիվոգ լինի՝ իմանան ուր պիտի գնան»:
Նա նաեւ հարցրեց, թե պարգեւատրումների հարցը ի՞նչ է լինելու, խոսքը ոչ ֆինանսական պարգեւատրումների մասին էր:
Նախարարը պատասխանեց, որ գերատեսչական հանձնաժողով են ձեւավորել՝ պետական եւ գերատեսչական պարգեւների համար. «Խստացրել ենք մոտեցումները: Առաջ ավանդույթ էր դարձել, որ երեք տարին մեկ գերատեսչությունը պարտավոր էր պարգեւատրել բոլորին, արդեն ասում էին՝ իմ երեք տարին լրացել է, ինչո՞ւ ինձ պարգեւ չեն տալիս: Ժամանակի բերումով այլեւս պարգեւներ չեն լինելու: Յուրաքանչյուր պարգեւատրում կապված է լինելու երկարամյա ծառայության որակի հետ, կոնկրետ ծառայության հետ»:
Ինչ վերաբերում է պահեստազորին, Վիգեն Սարգսյանն ասաց՝ պահեստազորայինը պատրաստվելու է պատերազմական վիճակում կոնկրետ հաստիքը լրացնելու: Գնալով մեր սպառազինության տեսակներն էլ են փոխվում եւ շատ ավելի մեծ պատրաստվածություն է պահանջում:
Արտերկրից մասնագետների ներգրավման սուր կարիք, նախարարն ասաց, որ այս պահին չկա: Նոր զինատեսակների ծառայության դնելիս, կարող է առաջանալ կարճաժամկետ ուսուցման խնդիր, կարող են այդ ժամանակ հրավիրել մասնագետներ՝ դասընթացների, որ սովորեցնեն ու հեռանան:
Հռիփսիմե ՋԵԲԵՋՅԱՆ
