Այսօր կեսօրին հրդեհ է բռնկվել Գյումրու Տեքստիլագործների թաղամասում, Շիրակի մարզպետարանի մոտակայքում գտնվող «ՕԿ» սուպերմարկետում։ Այրվել է երկհարկանի սուպերարկետի երկրորդ հարկում տեղակայված արագ սննդի կետը, որը ընդամենը վերջերս էր բացվել։
Ինչպես տեղեկանում ենք Արտակարգ իրավիճակների նախարարության պաշտոնական կայքից, հրդեհը բռնկվել է կեսօրին։ «ժամը 15:52-ին ահազանգ է ստացվել, որ Շիրակի մարզի Գյումրի քաղաքի Գ. Նժդեհի փողոցում այրվում է սուպերմարկետ: Դեպքի վայր է մեկնել չորս մարտական հաշվարկ»:
Բարեբախտաբար զոհեր, տուժածներ չկան, ապահովության նպատակով ժողովուրդը տարհանվել է։ Ըստ տեղի փրկարարների հաղորդած նախնական տվյալների, ամբողջությամբ այրվել է խոհանոցի առաստաղը, այն մոտ 84 քառակուսի մետր տարածք է կազմում (հանրախանութի երկրորդ հարկը մոտ 400 քառակուսի մետր տարածք է), ջերմահարվել է սպասասրահը, որը մոտ 150 քառակուսի մետր է, և վնասվել է խոհանոցի գույքը։
Դեպքի առթիվ հրդեհային տեսչությունը նյութեր է նախապատրաստվում, պարզում են հրդեհի առաջացման պատճառներն ու հանգամանքները։
Նշենք, որ սուպերմարկետը պատկանում է զորամասերից մեկի գլխավոր խոհարարին՝ Արամ Բադեյանին։ Այս սուպերմարկետից առևտուր են անում նաև ռուս զինվորականների ընտանիքները։
Նունե ԱՐԵՎՇԱՏՅԱՆ
