«Ես շատ բան գիտեմ». Աղվան Վարդանյանը՝ Սերժ Սարգսյանի՝ վարչապետ լինելու մասին (Տեսանյութ)

Այսօր լրագրողները ԱԺ ճեպազրույցների ժամանակ ՀՅԴ խմբակցության քարտուղար Աղվան Վարդանյանին հարցրեցին ԵԽԽՎ նախկին նախագահ Պեդրո Ագրամունտի հրաժարականից՝ արդյոք մեզ ձեռնտո՞ւ է ԵԽԽՎ-ից Ադրբեջանի դուրս գալը, որովհետեւ ՄԻԵԴ որոշումները չկատարելու մասով առաջիկայում կարող է գործընթաց սկսվել: Նա պատասխանեց, որ մեր պատվիրակության հետեւողական աշխատանքը նաեւ միջազգային մամուլի անդրադարձները օգնեցին: 3-4 տարի առաջ այս մասին ցածր ձայներ էին միայն հնչում, հետո աղմուկ բարձրացավ եւ Ադրբեջանը բավականին մեծ ճնշումների տակ ընկավ. «Ինչ կանի Ադրբեջանը, ԵԽ-ից դուրս կգա, չի գա՝ դա մեզ ոչ սառն է, ոչ տաք: Մենք մեր միջազգային պարտավորությունները պատրաստ ենք կատարել: Մենք այդ կառույցների անդամ ենք եւ պիտի կարողանանք այդ կառույցների՝ մեր պատկերացրած արժեքային համակարգերին մոտ լինել: Մնացածը իրենց գործն է: Ես ուրախ եմ, որ ի վերջո Ագրամունտը չդիմացավ ճնշումներին եւ հրաժարական տվեց: Ով կլինի հաջորդ նախագահը, բնականաբար հետեւություններ կանի եւ հետեւություններ կանեն եվրոպական տասնյակ օրենսդիրներ»:

Լրագրողները Աղվան Վարդանյանին հարցրեցին նաեւ՝ ՀՀԿ-ում անորոշություն է,թե ով է ի վերջո լինելու նոր կառավարության ղեկավարը եւ այդ հզոր լծակներով թեկնածուն, իսկ Սերժ Սարգսյանն այդ հարցին միանշանակ պատասխան չի տալիս, եթե Սերժ Սարգսյանը վարչապետի պաշտոնում շարունակի պաշտոնավարել՝ ՀՅԴ-ն սա ժողովրդավարության առումով հետքայլ կդիտարկի՞, թե՞ ոչ: Աղվան Վարդանյանը պատասխանեց՝ «Այդ հարցն անընդհատ սրելը, անընդհատ բերել օրակարգ, երբ վերջին շրջանում կարծես մարել է, խաղաղվել է՝ ժամանակին չէ: Կգա օրը, այդ հարցերի պատասխանները մենք բոլորս միասին կունենանք»:

Երբ ճշտեցին՝ ժամանակը ժողովրդավարության սկզբունքների առումով ի՞նչ է խանգարում, ի վերջո հստակ սկզբունքներ կան՝ Աղվան Վարդանյանը պատասխանեց. «Կա օրենսդրություն, կա ՀՀԿ, որին պատկանում է ըստ մեր համաձայնագրի վարչապետի թեկնածու առաջադրելու իրավունքը, երբ այդ իրավունքը իրացվի՝ մենք կխոսենք: Հիմա ժամանակավրեպ է այդ թեման քննարկելը: Եթե-ով հարցերին պատասխանելը լուրջ չէ: Կգա ժամանակը՝ եթե-ների այդ պատասխանը կիմանաք եւ գուցե նաեւ կափսոսաք, որ այսքան ժամանակ այդ հարցը եթե-ներով տվել եք»:

Լրագրողները ճշտեցին՝ այսինքն, ինչ-որ մի բան գիտե՞ք՝ նա պատասխանեց. «Ինչ-որ մի բանը շատ մեղմ է ասված, ես շատ բան գիտեմ»:

Իսկ ՀՀԿ խմբակցության ղեկավար Վահրամ Բաղդասարյանն ասաց. «Դրանք բոլորը ենթադրություններ են: Սերժ Սարգսյանը մինչեւ ապրիլ ՀՀ նախագահն է: Մենք որեւէ քննարկում չենք ունեցել: Կգա ժամանակը, կքննարկենք, դուք բոլորդ տեղյակ կլինեք դրա մասին: Զինվեք համբերությամբ: Մենք բավականին խնդիրներով ենք զբաղված: Կլինեն քննարկումներ՝ կիմանաք»:

Թե երբ են քննարկումները լինելու՝ նա ասաց, որ ժամանակացույցը չունեն, մինչեւ ապրիլ կիմանանք այդ մասին. «ԳՄ նիստում քննարկում ենք այն հարցերը, որոնք հրատապ են եւ առաջնահերթ»:

Հարցին՝ ՀՀԿ-ականները Սերժ Սարգսյանին չե՞ն հարցնում այդ մասին, թե ով է դառնալու վարչապետ՝ Վահրամ Բաղդասարյանն ասաց, որ դրա կարիքը չեն զգում հարցնելու, կգա ժամանակը, Սերժ Սարգսյանն ինքը կխոսի այդ մասին, հարցադրում անելու կարիքը չի լինի:

Հռիփսիմե ՋԵԲԵՋՅԱՆ