Կենտրոն եւ Նորք Մարաշ վարչական շրջանների ընդհանուր իրավասության դատարանում այսօր Արցախի ՊԲ նախկին հրամանատար Սամվել Բաբայանի եւ մյուսների գործով դատաքննության ժամանակ հրապարակվեց նաեւ ամբաստանյալ Կարեն Քոչարյանի նախաքննական ցուցմունքը:
Նա գործով մեկ այլ ամբաստանյալ՝ Անդրանիկ Քոչարյանի եղբայրն է:
Կարեն Քոչարյանն իր նախաքննական ցուցմունքում հայտնել էր, որ հեռախոսազրույց է ունեցել եղբոր հետ՝ ներկոտված թղթադրամների վերաբերյալ. «Եղբորիցս հետաքրքրվել եմ՝ արդյոք Ժորան մաքրե՞լ է այն, թե՞ ոչ: Ինչ վերաբերում է մեր խոսակցության այն հատվածին, որ ասում եմ՝ Ժորայի քյալամները, դա վերաբերում է նույն թղթադրամների նոր խմբաքանակի ձեռք բերմանը: Կոնկրետ թղթադրամների խմբաքանակի չափի վերաբերյալ ես դեռեւս տեղեկություններ չունեի: Չեմ հիշում՝ նույն օրը, թե հաջորդող օրը եղբայրս փոխանցել է Ժորայի կողմից մաքրված թղթադրամն ինձ, ինչն էլ ես նույն օրը տվել եմ Սամվել Բաբայանին»:
Առաջադրված մեղադրանքում Կարեն Քոչարյանն իրեն մեղավոր է ճանաչել մասնակի:
Հիշեցնենք, որ ըստ մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք:
Գործով որպես ամբաստանյալ անցնում են նաեւ Սանասար Գաբրիելյանը, Արմեն Պողոսյանը, Կարեն եւ Անդրանիկ Քոչարյանները, Ժորա Զաքարյանն ու Դավիթ Հարությունյանը:
Արփինե ՍԻՄՈՆՅԱՆ
