Վանաձորում ավարտվեց օլիմպիական խաղերի արծաթե մեդալակիր, Եվրոպայի չեմպիոն, աշխարհի եռակի գավաթակիր Ստեփան Սարգսյանի գավաթի միջազգային մրցաշարը:
Անվանի մարզիկը բացառիկ հարցազրույց տվեց Aravot.am-ին:
–Պարոն Սարգսյան: Արդեն 22 տարի տարբեր երկրների անվանի ըմբիշները ժամանում են Հայաստան, մասնավորապես, Վանաձոր՝ մասնակցելու ձեր սահմանած գավաթի խաղարկությանը: Այս տարի մրցաշարը համընկավ ձեր հարազատ Վանաձոր քաղաքի օրվա հետ: Դա պատահակա՞ն է ստացվել:
-Մենք Վանաձորի քաղաքապետի հետ խորհրդակցել էինք եւ որոշել մրցաշարը կազմակերպել Վանաձորի տոնի օրերին:
-Այս մրցաշարի անցկացումը Վանաձորում ի՞նչ է տալիս մեր ըմբիշներին:
-Իմ նպատակը Հայաստանում ազատ ոճի ըմբշամարտն էլ ավելի զարգացնելն է: Բարձր մարզական արդյունքների հասնելու համար միայն ամենօրյա մարզումները բավարար չեն: Անհրաժեշտ է հնարավորին չափ հաճախ մասնակցել միջազգային մրցաշարերի՝ բոլոր տարիքային խմբերում: Ես լավ գիտեմ, որ դրա համար շատ բան է արվել եւ արվում, բայց ավելին է հարկավոր:
Այս մրցաշարին իմ հրավերով գալիս են այլ երկրների ըմբիշները: Նրանց մեջ քիչ չեն ոչ միայն արդեն անվանիները, այլեւ նրանք, ովքեր սկսել են հաջողություններ արձանագրել միջազգային մրցագորգերում: Այսինքն, սա միջազգային մրցաշար է Հայաստանում, ինչը չի կարող դրական ազդեցություն չթողնել մեր թե ավագ եւ երիտասարդ ըմբիշների մարզական վարպետության բարձրացման, փորձի կուտակման եւ հոգեբանական պատրաստվածության վրա: Այս տարիներին քանի՞ օլիմպիական, աշխարհի ու մայրցամաքների չեմպիոններ ու մեդալակիրներ են եկել ու պարտվել: Դա, անկասկած, բարձրացնում է մեր ըմբիշների մարտական ոգին:
-Պարոն Սարգսյան: Այսօր Հայաստանի ըմբշամարտի ֆեդերացիան նախագահ չունի…
-Այո, դա այդպես է եւ այդ խնդրի լուծում պետք է գտնվի: Բայց շտապել պետք չէ: Հարկավոր է գտնել մի այնպիսի մարդու, որը նախ սիրի ըմբշամարտը, շատ սիրի եւ անհրաժեշտ ներդրումներ կատարի: Մենք ՀԱՕԿ նախագահի հետ այդ խնդրի շուրջ խոսել ենք ու քննարկումներ ենք անցկացնում լավագույն լուծում գտնելու համար:
Աշոտ ՀԱԿՈԲՅԱՆ
