Օլիմպիական խաղերի արծաթե մեդալակիր, Եվրոպայի չեմպիոն, աշխարհի եռակի գավաթակիր, ազատ ոճի ըմբիշ Ստեփան Սարգսյանի գավաթի միջազգային մրցաշարում Ռուսաստանը հաղթեց ութ քաշային կարգերից չորսում՝ մեկ ոսկե մեդալով գերազանցելով Հայաստանին:
Ռուսաստանի թիմը հիմնականում ներկայացված էր Հյուսիսային Օսեթիայի Հանրապետության ըմբիշներով:
Aravot.am-ը զրուցեց Հյուսիսային Օսեթիայի ըմբշամարտի ակադեմիայի գլխավոր տնօրենի տեղակալ Դիանա Բեկուզարովայի հետ: «Ես առաջին անգամ եմ Հայաստանում: Եղել եմ բազմաթիվ միջազգային մրցաշարերում, բայց Ստեփան Սարգսյանի գավաթի միջազգային մրցաշարը տարբերվում է նրանցից: Սա գերազանց մրցաշար է, որն ընթանում է կյանքով լի պայքարում: Լինում են մրցաշարեր, ուր բերում են ըմբիշներին, սակայն պայքարը մի տեսակ ձանձրալի է անցնում: Այստեղ յուրաքանչյուր գոտեմարտ աշխույժ է, պայքարով լի: Մենք Վանաձոր ժամանել ենք մեդալներ նվաճելու համար: Մեր թիմում կան երիտասարդների աշխարհի չեմպիոն, վերջերս անցկացված բանակայինների աշխարհի առաջնության մրցանակակիր, միջազգային մրցաշարերի, պատանեկան ամենատարբեր առաջնությունների հաղթողներ ու մեդալակիրներ: Ստեփան Սարգսյանի գավաթի միջազգային մրցաշարին մասնակցելը մեր, ինչպես նաեւ բոլոր ըմբիշների համար վարպետության բարձրացման, մրցափորձի ձեռք բերման շատ կարեւոր դարբնոց է»:
Աշոտ ՀԱԿՈԲՅԱՆ
