ՀԱՊԿ շտաբի պետ. «ՀԱՊԿ միացյալ ուժերը չեն կիրառվում անդամ-երկրների ներքին հակամարտությունների դեպքում» (Տեսանյութ)

Հայաստանում այսօր մեկնարկած՝ Հավաքական անվտանգության պայմանագրի կազմակերպություն միացյալ  հետախուզական ստորաբաժանումների «Որոնում 2017» մարտավարամասնագիտական  զորավարժությունների ժամանակ ՀԱՊԿ շտաբի պետ Անատոլի Սիդորովը լրագրողների հետ զրույցում անդրադարձավ հարցին, թե ո՞ր պետութունն է հանդիսանում զորավարժությունների պայմանական հակառակորդ:

«Հակառակորդին որոշելիս մենք նկատի չենք ունեցել որեւէ պետության: Ճիշտ է, ժամանակակից աշխարհում իրավիճակի եւ հակամարտության զարգացման բարդ գործընթաց կա: Շատ է խոսվում կիբերանվտանգության, ահաբեկչության մասին: Մենք զորավարժությունների  շրջանակում այդ ամենը եւս հաշվի ենք առել: Մշակել ենք դրանց հակազդման հարցերը»:

Սիդորովը պատասխանեց հարցին, թե արդյո՞ք  նախատեսվում է ՀԱՊԿ միացյալ ուժերի կիրառություն՝ կառույցի անդամ-երկրների ներքին համակարտությունների դեպքում. «ՀԱՊԿ միացյալ ուժերի կիրառման որոշում կայացնում է կառույցի խորհուրդը: Որպեսզի այդ ամենը ժամանակին կազմակերպվի, պարբերաբար իրավիճակի գնահատում է կատարվում: Բայց ՀԱՊԿ անդամ-երկրներում ներքին հակամարտությունների դեպքում ՀԱՊԿ միացյալ ուժերի կիրառություն չի նախատեսվում»:

Թե որ դեպքում ՀԱՊԿ-ն օգնության կհասնի ՀՀ-ին, Սիդորովը նկատեց. «Հասկանում ենք, թե Հայաստանն ինչ ցավ ունի եւ աշխարհը գիտի այն հակամարտության մասին, որը չի հաջողվում մինչեւ վերջ  լուծել խաղաղ ճանապարհով: ՀԱՊԿ միացյալ ուժեր նախատեսված են տարածքային անդամ-երկրների ամբողջականության պահպանման համար: Եթե երկրներից մեկին պետք  լինի իրական օգնություն, ապա միացյալ ուժերի թիվը բավականին մեծ է: Նրանք պատրաստ կլինեն գալ եւ օգնության հասնել՝ ՀԱՊԿ խորհրդի համապատասխան որոշմամբ: Կասկած չպետք է լինի այդ հարցում»:

Մանրամասն՝ տեսանյութում:

Լուիզա ՍՈՒՔԻԱՍՅԱՆ