Կենտրոն եւ Նորք-Մարաշ վարչական շրջանների ընդհանուր իրավասության դատարանի վարույթում էր գտնվում «Էյր Արմենիայի» սնանկության վերաբերյալ գործը:
Երկու տարի առաջ նոյեմբերի 2-ին ընկերությունը ճանաչվել է սնանկ, եւ կառավարիչ էր նշանակվել Կարեն Ասատրյանը: Ընկերության աշխատանքների դադարեցման հետեւանքով աշխատանքից ազատվել էին տասնյակ աշխատակիցներ, չէր տրվել նրանց աշխատավարձն ու վերջնական գումարը:
Ընկերության 17 բորտուղեկցորդուհիների ներկայացուցիչն էր ՀՀ փաստաբանների պալատի անդամ, փաստաբան Ելենա Կասպարովան (նկարում): Վերջինս երեկ «Առավոտի» հետ զրույցի ժամանակ տեղեկացրեց, որ իր վստահորդների անունից սնանկության գործով դիմել է դատարան, իսկ սնանկության գործով կառավարիչը չի առարկել:
Ըստ փաստաբանի՝ ընկերության նախկին աշխատակիցները օրեր առաջ՝ սեպտեմբերի 26-ին ստացել են իրենց գումարների 52 տոկոսը:
Ի դեպ, աշխատակիցների մեջ կային այնպիսիները, ովքեր «Էյր Արմենիա» ՓԲ ընկերությունից էին եկել «Արմավիա» ՓԲԸ, որտեղ մի անգամ տուժել էին, երբ «Արմավիա» ընկերությունը հայտնվել էր սնանկների նստարանին:
Ավագ բորտուղեկցորդուհիներից մեկին աշխատանքից ազատել էին դեռ երեք տարի առաջ: Ըստ դատարան ներկայացված դիմումի, գործատուն չէր վճարել ինչպես աշխատավարձը, այնպես էլ վերջնահաշվարկի գումարը, որը կազմել էր մոտ 300 000 դրամ: Մինչդեռ համաձայն ՀՀ աշխատանքային օրենսգրքի, աշխատավարձը յուրաքանչյուր ամիս հաշվարկվում է եւ վճարվում է աշխատողին ամսական առնվազն մեկ անգամ՝ մինչեւ հաջորդ ամսվա 15-ը:
Մինչդեռ, գործատուն տվյալ օրինակով իր աշխատակցին չէր վճարել երեք տարի:
Բորտուղեկցորդուհիներից մեկն էլ չէր ստացել իր 1 միլիոնից ավելի դրամը: Նա դիմել էր դատարան, որպեսզի իր հերթը տեղափոխվի «առաջ», ըստ իրավական ձեւակերպման՝ Ը պահանջը տեղափոխվի Գ հերթի տակ:
Ըստ փաստաբան Ե. Կասպարովայի դիմումների. «Քանի որ առկա է հստակ մտավախություն, որ սնանկ ճանաչված ընկերության ակտիվների օտարումից հետո Ը հերթի տակ գրանցված պահանջատերերը հնարավոր է՝ չստանան գումարները, ինչի արդյունքում ավելի կխախտվեն արդեն իսկ խախտված պահանջատերերի իրավունքները», ուստի խնդրել էր պահանջատեր վստահորդի գումարի պահանջի Ը հերթը տեղափոխել Գ հերթի տակ:
Դատարանը բավարարել էր այս դիմումը նույնպես, ինչին կառավարիչը չէր առարկել:
Նկատենք, որ ընկերության աշխատակիցներին չվճարած գումարները տարբեր էին՝ երեք հարյուր հազար դրամից մինչեւ մեկ միլիոն դրամի չափով:
«Առավոտի» տեղեկություններով՝ «Էյր Արմենիա» ընկերությունը վաճառում է իր գույքը աճուրդով, որպեսզի մնացած աշխատակիցների գումարները վճարի:
ՌՈՒԶԱՆ ՄԻՆԱՍՅԱՆ
«Առավոտ»
06.10.2017
