Կենտրոն եւ Նորք-Մարաշ վարչական շրջանների ընդհանուր իրավասության դատարանն ամենաբարձր՝ յոթուկես տարվա ազատազրկման դատապարտեց «Կենտրոն Մաքրություն» ընկերության պատասխանատու Արթուր Հովհաննիսյանին:
Նրա եղբորը՝ Սամվելին, որը նախկինում զբաղեցրել էր նույն այդ ընկերության տնօրենի պաշտոնը, դատապարտեց հինգ տարվա ազատազրկման, որից երեք տարի նշանակվեց փորձաշրջան:
Փոխտնօրեն Արմեն Խաչատրյանն ու գլխավոր հաշվապահ Գագիկ Հարությունյանը դատապարտվեցին հինգուկես տարվա ազատազրկման, երեք տարվա փորձաշրջանով:
Հինգական տարվա ազատազրկման դատապարտվեցին «հանցավոր խմբի անդամներից»՝ աշխատակիցներ Հրայր Հակոբյանն ու Ռոբերտ Խաչատրյանը:
Միակ կինը՝ աշխղեկ, ազգությամբ եզդի Գյուլիզար Շամոյանը դատապարտվեց հինգ տարվա, մյուս աշխղեկը՝ Սամվել Եղոյանը, հինգուկես տարվա ազատազրկման, նրանց համար նույնպես նշանակվեց երեք տարվա փորձաշրջան:
Պահեստապետ Գարեգին Գասպարյանը եւ դիսպետչեր Հունան Տեր-Հովհաննիսյանը դատապարտվեցին չորսուկես տարվա ազատազրկման, դարձյալ երեք տարվա փորձաշրջանով:
Ընկերության ավտոկայանի վարիչ Միսակ Հարությունյանը, կադրերի վարիչ Սամվել Պապոյանը, ինժեներ Տիգրան Հովհաննիսյանը վեց ամսով ազատազրկվեցին: Վերջինիս համար նշանակվեց մեկ տարով փորձաշրջան:
Տասներեք հոգանոց գործերից սա թվով երրորդն էր, որը լսեց Կենտրոնի դատարանը. Վազգեն Խաչիկյանի եւ սոցապի մյուս աշխատակիցների, Միսակ Մարտիրոսյանի եւ դատական կարգադրիչների գործից հետո:
Ռ. Մ.
«Առավոտ»
06.10.2017
