Իսկ 20 հոգի հնարավորություն է
ստացել մասնագիտական գործիքներ ու նյութեր ձեռք բերել
«Օրրան» բարեգործական հասարակական կազմակերպությունը «Youth Opportunities Programme» կրթական ծրագրի դրամաշնորհի շրջանակներում, 2016թ.-ի նոյեմբերին մեկնարկեց սոցիալապես անապահով ընտանիքների 120 երեխաների հավաքագրում՝ վերջիններիս մասնագիտական կրթություն տալու նպատակով: Ինչպես «Առավոտին» տեղեկացրին «Օրրանի» լրատվականից, երեխաները Երեւանից եւ Հայաստանի տարբեր շրջաններից էին՝ Գյումրի, Վանաձոր, Կապան, Դիլիջան, Աշտարակ, Էջմիածին, սահմանամեձ գյուղերից՝ Խաչիկ, Չիվա: Ծրագրի մասնակիցները ընտրվել են հիմնականում այն վայրերից, որտեղ գործազրկության եւ աղքատության ցուցանիշը շատ բարձր է: Շահառու երեխաներին հնարավորություն էր տրվել սովորելու իրենց նախընտրած արհեստը: Նրանք ընտրել են առավել պահանջված մասնագիտություններ՝ վարսահարդար, ավտոմեխանիկ, հրուշակագործ, տոնական սեղանների դիզայներ, ֆլորիստ, հացթուխ, քարտաշ, գորգագործ, խեցեգործ, հագուստի դիզայն, կարուձեւ եւ այլն: Հավելենք, որ ծրագիրն իրականացվել է Էյչ-Էս-Բի-Սի Բանկի կողմից տրամադրված դրամաշնորհով: Մինչ ծրագրի ավարտը՝ Բանկի աշխատակիցները շփվել են մասնակիցների հետ, կատարել ծրագրի ընթացիկ գնահատում, իսկ մասնագիտական ուսուցման ավարտից հետո ընտրել լավագույն 20 շահառուների, որոնցից յուրաքանչյուրին տրամադրվել է 400 ԱՄՆ դոլարին համարժեք դրամ: Այդ փոքրիկ դրամաշնորհով նրանք կկարողնան ձեռք բերել իրենց համար անհրաժեշտ մասնագիտական գործիքներ եւ նյութեր, որոնք անհրաժեշտ կլինեն աշխատանքային առաջին քայլերի ճանապարհին:
Գ. Հ.
«Առավոտ»
06.10.2017
