ՀՀ ԳՆ սննդամթերքի անվտանգության պետական ծառայությունը, պետական վերահսկողության շրջանակներում, դիտարկում է իրականացրել «Հայրենյաց Բարիքներ» ՍՊԸ-ում: Լաբորատոր փորձաքննության նպատակով՝ պատրաստի արտադրանքի խմբաքանակից (տոմատի մածուկ՝ արտադրված ГОСТ Р 54678-2011 նորմատիվ փաստաթղթով 02.2017-ին) կատարվել է նմուշառում:
Փորձաքննութան արդյունքներով՝ տոմատի մածուկը լուծված չոր նյութի զանգվածային մաս և քլորիդների զանգվածային մաս ցուցանիշներով չի համապատասխանել նորմատիվ փաստաթղթով սահմանված պահանջներին. տոմատի մածուկի դեպքում այն պետք է լինի 25 տոկոս, մինչդեռ կազմել է 13,5 տոկոս, ուստի այդ արտադրանքը չի կարող համարվել «տոմատի մածուկ», այլ հանդիսանում է «տոմատի խյուս»: Սա նշանակում է, որ ընկերությունն արտադրել և իրացրել է տեխնիկական կանոնակարգի պահանջներին չհամապատասխանող (կեղծված) սննդամթերք:
Ծառայության կողմից տրվել է տոմատի մածուկի իրացումն արգելելու, շուկայից հետ կանչելու կարգադրագիր: Հանձնարարվել է վերացնել խախտումները և իրացնել օրենսդրությանը համապատասխանող արտադրանք, որի կատարման համար սահմանվել է ժամկետ:
Սպառողներին կոչ ենք անում ձեռնպահ մնալ նշված խմբաքանակը ձեռքբերելուց, իրացման ցանցերին՝ առկայության դեպքում այն հետ վերադարձնել:
Աղբյուրը՝ snund.am
