«Ելք» խմբակցության ղեկավար Նիկոլ Փաշինյանը ԱԺ-ում անդրադարձավ այն միջադեպին, որը տեղի էր ունեցել իր եւ ՀՀԿ խմբակցության պատգամավոր Արտաշես Գեղամյանի մեջ: Նա հայտարարեց՝ «Մոտ մեկ ժամ առաջ ԱԺ միջանցքում ՀՀԿ խմբակցության անդամ Արտաշես Գեղամյանը խուլիգանի նման բռունցքներով հարձակվել է ինձ վրա եւ հետաքրքիրն այն է, որ նա հիմա հերքում է: Վկաներ են եղել՝ ե՛ւ լրագրող, պատգամավոր, ԱԺ-ի անվտանգության աշխատակիցներ: Մենք պարզաբանում ենք պահանջում տեղի ունեցածի կապակցությամբ ՀՀԿ խմբակցությունից: Հստակ պետք է պարզաբանվի, թե այս խուլիգանական պահվածքն ինչ կապ ունի Վահրամ Բաղդասարյանի՝ ոչ հեռավոր անցյալում արտահայտած այն մտքի հետ, թե ձեր պոդյեզդները զգույշ մտեք, կարող է ինչ-որ բաներ տեղի ունենա»:
Նիկոլ Փաշինյանն ասաց, որ հետեւություններ կանեն՝ հետագայում ԱԺ-ում աշխատելու վերաբերյալ:
Նիստը վարող Միքայել Մելքումյանն ասաց, որ բոլորն իրենց մտահոգությունն են հայտնում եւ իսկապես պետք է լինեն պարզաբանումներ, գնահատականներ:
ՀՀԿ փոխնախագահ Արմեն Աշոտյանն էլ ասաց, որ միջադեպից տեղյակ չէ, բոլոր դեպքերում դատապարտելի է քաղաքական մշակույթի մեջ ցանկացած միջանձնային հարաբերությունները ոչ քաղաքական գործիքակազմով լուծելու փորձ. «Թե ինչ է եղել իրականում եւ ոնց՝ ժամանակ կլինի, եւ դուք, եւ պարոն Գեղամյանը եւ ձեր, մեր խմբակցությունները այդ հարցին կանդրադառնան»:
«Ելք» խմբակցության պատգամավոր Մանե Թանդիլյանը պահանջեց գնահատական տալ Գեղամյանի պահվածքին, դատապարտել: Նա ասաց, որ որեւէ պատգամավորի միջանցքում ծեծի ենթարկելը անթույլատրելի է:
Նա հիշեցրեց, որ թուրքական պառլամենտում էլ Կարո Փայլանին են ծեծի ենթարկում ու պետք է լինեն դատապարտող հայտարարություններ ՀՀԿ-ից. «Պետք է կարողանանք ցույց տալ, որ մենք ազատ խոսքը կաշկանդելու միջոցներ չենք փնտրում այս դահլիճում, որեւէ մեկի անուն տալը չպիտի ենթադրի, որ պատգամավորին ծեծի ենթարկեն»:
Արմեն Աշոտյանը զարմացած էր՝ ԱԺ ամբիոնին մոտեցել էր՝ սնդիկի հետ կապված «ամենաանշառ» թեմայով զեկուցելու ու քաղաքական գնահատականներ են պահանջում մի ծեծի մասին, որից տեղյակ չէ:
Արտակ Զեյնալյանն էլ ասաց, որ պահանջում են էթիկայի հանձնաժողով ստեղծել, որը գնահատական կտա կատարվածին:
Արմեն Աշոտյանը դեմ չէր էթիկայի հանձնաժողովում հարցը քննարկելուն:
Հռիփսիմե ՋԵԲԵՋՅԱՆ
