Սպորտային մարմնամարզության Հայաստանի ազգային հավաքականի երեք անդամներ՝ Հարություն Մերդինյանը, Արթուր Դավթյանը եւ Վահագն Դավթյանը Կանադայում են: Նրանք Մոնրեալում մասնակցում են աշխարհի առաջնությանը։
Բազմամարտի որակավորման փուլում Արթուր Դավթյանը 81.346 միավորով զբաղեցրել է 15-րդ հորիզոնականը եւ անցել է եզրափակիչ: Անկախ Հայաստանի պատմության մեջ առաջին անգամ մեր երկիրն աշխարհի առաջնության բազմամարտի եզրափակչում մասնակից ունեցավ։
Ութերորդ տեղով (14.433 միավոր) ուժեղագույնների խումբ է մտել նաեւ մեր ամենափորձառու մարմնամարզիկը՝ Հարություն Մերդինյանը (նժույգ թափեր)։
Օղակներում Վահագն Դավթյանը նույնպես իր անվան դիմաց գրանցել է 14.433 միավոր, սակայն հանգրվանել է 16-րդ հորիզոնականում եւ դուրս մնացել հետագա պայքարից:
Այսօր բազմամարտի եզրափակչում պայքարը կշարունակի Արթուր Դավթյանը: Հարություն Մերդինյանը հանդես կգա հոկտեմբերի 7-ին:
Աշոտ ՀԱԿՈԲՅԱՆ
