«Զորավարժությունն ուժի ցուցադրում է. պետք է գիտակցենք, որ զորավարժությունը նաև կարելի է օգտագործել հարձակման համար: Դու կուտակում ես տեխնիկա, բարձրացնում բանակի մարտունակության վիճակը»,- լրագրողների հետ հանդիպմանը, անդրադառնալով հոկտեմբերի 6-ին Հայաստանում սպասվող ՀԱՊԿ-ի լայնամասշտաբ զորավարժություններին, հայտարարեց պաշտպանության նախկին նախարար Վաղարշակ Հարությունյանը: Պարոն Հարությունյանը տեղեկացրեց, որ ՀԱՊԿ-ի «Մարտական եղբայրություն-2017» զորավարժությունների գործողությունների վայրը Բաղրամյան և Ալագյազ զորավարժարաններն են։
Զորավարժությունները կանցկացվեն չորս պետությունների տարածքում՝ ՌԴ, Հայաստան, Ղազախստան, Տաջիկստան և մասնակցելու են շ ՀԱՊԿ անդամ բոլոր պետությունները: Զորավարժությունների ծավալներն են՝ 12 հազար անձնակազմ, 1500-ից ավելի զրահատեխնիկա և այլ տեխնիկա, 50-ից ավելի թռչող սարքեր. «Զորավարժությունների նպատակը մեկն է՝ կանխել ագրեսիան Հայաստանի դեմ այս տարածքում: Այստեղ մասնակցելու են նաև օպերատիվ արձագանքման կոլեկտիվ ուժերը»:
Պարոն Հարությունյանը շեշտեց, որ զորավարժությունը լավ առիթ է Ադրբեջանին հիշեցնելու, թե ինչ ուժ է կանգնած իր արևմտյան սահմաններին. «Մեր ազգային բանակը ուժեղանում է, Հայաստանը դրանով կանխում է ագրեսիան՝ բանակի մարտունակությամբ և այս ուժի ցուցադրումով։ Իսկ զորավարժությունն ուժի ցուցադրում է»։
Հարցին՝ անընդհատ խոսվում է ՀԱՊԿ-ի անվտանգության ապահովման մասին, իսկ ո՞ւր էր ՀԱՊԿ-ը ապրիլյան պատերազմի օրերին, պարոն Հարությունյանն արձագանքեց. «Ղարաբաղն այդ պայմանագրի մասնակից չէ, ուստի ապրիլյան պատերազմի ժամանակ ՀԱՊԿ-ը ի՞նչ գործ ուներ այնտեղ: ՀԱՊԿ-ը վերաբերվում է ՀՀ անվտանգությանը, ինչո՞ւ ենք մենք նույն հարցը կրկնում: Հատուկ հնչեցնում ենք, որ ՀԱՊԿ-ը վարկաբեկե՞նք: Ղարաբաղը չի մտնում ՀՀ կազմի մեջ, իսկ ՀԱՊԿ-ի իրավական դաշտը և աշխարհագրությունը Հայաստանն է: Այնպես որ, ՀԱՊԿ-ն իր տեղում էր»:
Դիտարկմանը՝ Հայաստանը կաշկանդված չէ՞ ՆԱՏՕ-ի հետ հարաբերություններում, քանի որ ՀԱՊԿ անդամ է, պարոն Հարությունյանն արձագանքեց. «Ոչ մի կաշկանդվածություն չկա: Վրաստանը, Ուկրաինան և այլ պետությունները ՆԱՏՕ-ի հետ համագործակցության նույն մակարդակի են հասել, ինչ Հայաստանը: Իսկ ո՞նց եղավ, որ ՀՀ-ն մի կողմից ունի երաշխավորված պայմանագիր, որտեղ ՀԱՊԿ-ը և ՌԴ-ն ապահովում են մեր անվտանգությունը, մյուս կողմից ՆԱՏՕ-ի հետ համագործակցություն ունենք, բայց ՆԱՏՕ-ն չի տալիս անվտանգային երաշխիքներ»:
Տաթև ՀԱՐՈՒԹՅՈՒՆՅԱՆ
