«Կփորձեն գործերից մեկով ստանալ իշխանություններին հարմար դատավճիռ». «Սասնա ծռերի» փաստաբան (Տեսանյութ)

Ինչպես ավելի վաղ հայտնել էինք, 2016թ. ոստիկանության ՊՊԾ գունդը գրաված եւ ծանր հանցագործությունների մեջ մեղադրվող «Սասնա ծռեր» զինված խմբի անդամներից 14-ի գործը եւս այսօր «կիսվեց» երկու մասի, որոնցից մեկը շարունակելու է քննել դատավոր Արտուշ Գաբրիելյանը: «Սասնա ծռերի» պաշտպաններից փաստաբան Նինա Կարապետյանցը դատարանում լրագրողների հետ զրույցում ասաց. «Այս կերպ հնարավոր չէր շարունակել դատավարությունը: Փաստաբաններիս նման դիմադրությանը չէին սպասում: Թող չնեղանան հանրային պաշտպան- գործընկերներս, բայց հույս կար մեզ փոխարինել հանրային պաշտպաններով, սակայն դա էլ չստացվեց»:

Նինա Կարապետյանցի խոսքով՝ դատավոր Արտուշ Գաբրիելյանն ակնհայտորեն չէր տիրապետում իրավիճակին, ուստի որոշում կայացվեց գործերը նման  կերպ «կիսել»: Այնուամենայնիվ, ըստ փաստաբանի, դա խնդիրներ է առաջացնելու. «Կարծում եմ՝ կփորձեն գործերից մեկով ստանալ իշխանություններին հարմար դատավճիռ, որը մյուս երկու գործերում կօգտագործեն որպես օրինական ուժի մեջ մտած ապացույց: Երբ մի գործով վճիռ կայացվի, մյուս գործերով դատավորները, միանշանակ, կաշկանդված կլինեն»:

Հիշեցնենք, որ ըստ մամուլում առկա տեղեկությունների՝ երեք մասի բաժանված գործերից մեկը քննելու է Էրեբունի և Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը, մյուսը՝ դատավոր Մեսրոպ Մակյանը:

Մանրամասն՝ տեսանյութում:

Լուիզա ՍՈՒՔԻԱՍՅԱՆ