«ԵԱՏՄ-ից դուրս գալն այս պահին կարող է ավելի վտանգավոր լինել»,- անդրադառնալով «Ելք» դաշինքի` ԵՏՄ-ից դուրս գալու նախագծին, այսօր «Հենարան» ակումբում, պատասխանելով Aravot.am-ի հարցին, թե որքանով է այն իրատեսական, ասաց տնտեսագետ Մեսրոպ Առաքելյանը: Ըստ նրա «Ելքի» համար այլընտրանքը Եվրամիության հետ ասոցացման համաձայնագիրն է:
Տնտեսագետի խոսքով, եթե հետ գնանք 5 տարի առաջ, ապա կարելի էր քննարկել, որ Եվրամիության հետ ասոցացման համաձայնագրի ստորագրումը կբերեր ներդրումներ, ենթակառուցվածքների զարգացում, տնտեսության աշխուժացում. «Այսինքն` ասել, որ Եվրամիության հետ ասոցացումը մեզ ոչինչ չէր տալու` այդպես չէ, բավականին լուրջ ձեռքբերումներ կարող էինք ունենալ: Այս ամեն ինչի հիմքում չի կարելի բացառել քաղաքական գործոնը, ցանկացած որոշում պետք է տեղի եւ ժամանակի մեջ կայացվի»:
Պարոն Առաքելյանի մեկնաբանություններն առավել մանրամասն` տեսանյութում
Հայաստան-սփյուռք համաժողովի ժամանակ վարչապետ Կարեն Կարապետյանը պատասխանելով սփյուռքահայ գործարարի հարցին` թե ինչ տվեց Հայաստանին ԵԱՏՄ-ն, ասաց, որ այդ միությանն անդամագրվելով «Մենք ընկերություն ենք անում ոչ ի վնաս այլ հարաբերությունների»: Aravot.am-ի այն հարցին, թե արդյոք ԵԱՏՄ մտնելով մեր երկիրը վնասներ չկրե՞ց այլ միությունների հետ հարաբերվելիս, պարոն Առաքելյանը պատասխանեց, որ Եվրամիության մասով մեր երկրում մաքսատուրքերը այդ միությունից ներկրվող ապրանքների համար բարձրացան:
«Իհարկե միությանն անդամակցությանն իր հետ բերում է որոշակի պարտավորություններ ի հաշիվ այլ երկրների հետ հարաբերությունների: Դա ցանկացած միությունում այդպես է, մի տեղ անդամակցելով, մյուս տեղում կորցնում ենք: Տարեցտարի Եվրասիական տնտեսության երկրներից դուրս ներմուծելու դեպքում մենք ունենում ենք ավելի բարձր մաքսատուրքեր»:
Մեսրոպ Առաքելյանը խոսելով այս օրերին արձանագրված գնաճից՝ դրա հիմնական պատճառ նշեց մենաշնորհները: Տնտեսագետի խոսքով, իշխանությունները թանկացումները պայմանավորում են միջազգային գների բարձրացմամբ:
«Կարագի գները միջազգային շուկայում մի փոքր բարձրացել են, խոսքը նոր զելանդական կարագի մասին է, բայց այնպես չէ, որ Հայաստան միայն նոր զելանդական կարագ է ներմուծվում: Կա նաեւ ֆիննական եւ այլ երկրներից ներկրվող կարագ: Այնպես որ մեղքը դնել Նոր Զելանդիայի վրա, այնքան էլ այդպես չէ»:
Ըստ տնտեսագետի, եթե ապրանքը թանկանում է 20 տոկոսով Հայաստանում ապրանքը նույնքան թանկանում է. «Սակայն, եկեք չմոռանանք, որ ապրանքի գնի մեջ ապրանքի ինքնարժեքից բացի, ի վերջո, մտնում են նաեւ այլ ծախսեր»:
Լուսինե ԲՈՒԴԱՂՅԱՆ
