ՀՀ զինված ուժերի եւ Ռուսաստանի Դաշնության զինված ուժերի, զորքերի միացյալ խմբավորման մասին համաձայնագրի վավերացման հարցն է ԱԺ-ում քննարկվում:
«Ելքի» պատգամավոր Գեւորգ Գորգիսյանն ասաց. «Ես այստեղ տեսնում եմ ծուղակ, եթե մեր կողմը չգիտի դեռ թե որ կողմի վրա պետք է կրակի այս հրացանը, գուցե մյուս կողմն ունի այդ պլանը»: Ըստ նրա, համաձայնագրում լուրջ մտահոգիչ կետեր կան:
Իսկ «Ելքի» պատգամավոր Արամ Սարգսյանը կիսվեց իր տպավորություններով. «Տպավորություն ունեմ, որ այս համաձայնագիրը «եւ-եւ»-ի մեր քաղաքականության փայլուն դրսեւորումներից է: Մեր արտգործնախարարության քվեարկությունները բոլոր ամբիոններում ուղղակի ՌԴ-ի քվեարկության կրկնություններն են, մեր էներգետիկ համակարգն ամբողջությամբ ՌԴ-ի տրամադրության տակ է, մեր տնտեսական համակարգը «Գույք պարտքի դիմաց»-ով վաղուց տրված, անցած է, ռազմական համակարգում համաձայնություն ունենք ՀԱՊԿ-ի շրջանակներում, օդն ենք տրամադրել, կապն ենք տրամադրել, Ադրբեջանն էլ ՀԱՊԿ-ի հետ պայմանագիր չունի, հիմա չեմ հասկանում, սրա անհրաժեշտությունը ո՞րն է: Ինձ համար, որպես մարդու, քաղաքացու, այս պայմանագիրն անգամ վիրավորական է: Լավ ո՞նց կարելի է այսքան սեփական ուժերին չվստահել, ո՞նց: Վերջիվերջո երրորդ կողմ, բացի մեզանից, չկա, որ այս պայմանագիրը ՌԴ-ի հետ ստորագրի, որովհետեւ նույն ղազախները, ղրղըզները, Բելառուսը, որ նույն լեզուն ունի, իրենց ինքնիշխանությունն ավելի բարձր են դասում: Համարում են, որ իրենց չփորձված բանակները այս գործընթացը կարող են տանել»:
Ըստ Արամ Սարգսյանի, կարող է ինչ-որ մի գաղտնի փաստաթուղթ էլ կա, որի համաձայն, համապատասխան իրավիճակում ՀՀ բանակի գերագույն գլխավոր հրամանատարը դառնա ՌԴ նախագահ Պուտինը. «Չեչնիան շատ ավելի լայն ազատություններ ունի, քան մենք, հերիք եղավ, հաջորդ օրենքն էլ ի՞նչ է լինելու: Է գնանք մտնենք ՌԴ-ի կազմ, վե՛րջ: Բա դրոշը, զինանշանը, օրհներգն ինչների՞ս է պետք, ինչքա՞ն կարելի է»:
Հռիփսիմե ՋԵԲԵՋՅԱՆ
