«Հայաստանը միայնակ չի կարող ամբողջությամբ իրականացնել իր պաշտպանությունը». Շարմազանով (Տեսանյութ)

Խորհրդարանում ՀՀ զինված ուժերի եւ Ռուսաստանի Դաշնության զինված ուժերի, զորքերի միացյալ խմբավորման մասին համաձայնագրի վավերացման հարցի քննարկման ժամանակ, ԱԺ փոխխոսնակ Էդուարդ Շարմազանովն ասաց. «Հայ-ռուսական հարաբերությունները կրում են դաշնակցային բնույթ, գտնվում են նույն անվտանգային համակարգում՝ ՀԱՊԿ-ում: Այս զորախումբը, որ գործում էր դե ֆակտո, դրա մասին նաեւ ՀՀ նախագահն է անցյալ տարի հայտարարել՝ Կիսիլյովի հետ հարցազրույցի ժամանակ, սա որեւիցե գաղտնիք չէ: Եթե մարդիկ գտնում են, որ ՀԱՊԿ-ը պետք է փոփոխության ենթարկվի, դա իրենց քաղաքական ճաշակի խնդիրն է, ես այդպես չեմ կարծում: Սա բխում է մեր ռազմական դոկտրինից»:

Խոսք գնաց այն մասին՝ Ադրբեջանը կարո՞ղ է ստորագրել այսպիսի մի համաձայնագիր՝ ՌԴ-ի հետ:

Շարմազանովն ասաց. «Ոչ, անհնար է, որովհետեւ Ադրբեջանն ու ՌԴ-ն տարբեր անվտանգային հարաբերությունների մեջ են: ՌԴ-ն ՀԱՊԿ-ի անդամ է, ՀՀ-ն ՀԱՊԿ-ի անդամ է, Ադրբեջանը՝ ոչ: Ադրբեջանի միակ եւ ամենաուժեղ դաշնակիցը Թուրքիան է, որը տրամագծորեն այլ ռազմական դաշինքի մեջ է՝ Հյուսիս-ատլանտյան: Թուրքիան այն երկիրն է, որը Պակիստանի հետ մեկտեղ պաշտպանեց, խրախուսեց Ադրբեջանի ռազմական ագրեսիան ապրիլյան պատերազմի ժամանակ: Վերջերս իրենց ազգային պաշտպանության նախարարը Բաքվում հայտարարեց, որ նրանք եղբայրներ են եւ Թուրքիան ամեն ինչով պետք է սատարի Ադրբեջանին, հետեւաբար Թուրքիան Ադրբեջանի հետ միասին մնում է ՀՀ-ի համար անվտանգության սպառնալիք, ՀՀ-ն միայնակ չի կարող ամբողջությամբ իրականացնել իր պաշտպանությունը: Մենք պետք է լինենք այս կամ այն ռազմաքաղաքական բլոկի անդամ: Մենք ընտրել ենք ՀԱՊԿ-ը, որովհետեւ այլընտրանք չկա: ՀԱՊԿ-ի այլընտրանքը Թուրքիան է, իսկ մենք այնտեղ անելիք չունենք:

Հռիփսիմե ՋԵԲԵՋՅԱՆ