Խորհրդարանում քննարկվեց «Դատախազության մասին» նոր օրենքը:
«Ելք» խմբակցության ղեկավար Նիկոլ Փաշինյանն իր ելույթում խորհուրդ հարցրեց հիմնական եւ հարակից զեկուցողներին՝ օրենքում ի՞նչ պիտի փոխենք, որ դատախազությունը դադարի հանցագործությունները կոծկող մարմին լինել:
Նա «զիբիլիքսի» հայտնի գործը մեջբերեց, երբ ՀՀԿ-ի շտաբի մոտից հայտնաբերել էին ՊՊԾ գնդի ֆաքսեր, փաստաթղթեր, որոնք, ըստ Փաշինյանի, վկայում էին ՀՀԿ-ի կողմից ընտրակաշառքի համակարգված մեխանիզմի մասին: Նա ասաց, որ դատախազությունը ոչ մի կերպ չի ուզում պարզել, թե այդ ֆաքսը, որը կոնկրետ օր կոնկրետ ժամին դուրս է եկել, ուր է գնացել, ում է հասցեագրվել, որ պարզվի՝ դա հավաք է, զորահավաք է, դրամահավաք է, թե ընտրակաշառքահավաք. «Արաբկիրի ոստիկանությունից դուրս է եկել, դատախազությունը չի ուզում պարզի: Մենք ասում ենք, որ սա գնացել է ՀՀԿ-ի նախընտրական շտաբ: Սա մեր պետության խայտառակությունն է, որ ոստիկանության բարձրաստիճան պաշտոնյան ցուցակ է անում ՊՊԾ գնդի աշխատողների անհատական տվյալներով, ֆաքս է անում ՍԱՍ սուպերմարկետի ախրանայի պետին, իսկ դատախազությունը՝ գլխավոր դատախազ Արթուր Դավթյանի գլխավորությամբ, աչքերն էլ է փակում, ականջներն էլ: Դե հիմա ասեք՝ ի՞նչ փոխենք օրենքի մեջ, որ այսպես չլինի հետագայում»:
Հռիփսիմե ՋԵԲԵՋՅԱՆ
