Փորձագետ Կարեն Վարդանյանի սպանության գործով դատաքննության ժամանակ այսօր հարցաքննվեց գործով ամբաստանյալ Արթուր Միհրանյանը:
Նրա պատմելով՝ հանցագործությունն ինքն է կատարել, իսկ գործով մյուս ամբաստանյալ Գեւորգ Զոհրաբյանը մասնակցություն չունի: Մեղադրող դատախազը միջնորդեց հրապարակել նրա նախաքննական ցուցմունքը՝ ասելով, որ էական հակասություններ կան նրա դատաքննական ու նախաքննական ցուցմունքների մեջ:
Դատարանը բավարարեց այս միջնորդությունը: Միհրանյանն իր նախաքննական ցուցմունքում Զոհրաբյանի մասնակցության մասին էր պատմել, դատավարության կողմերի հարցերին, թե ինչու է նախաքննության ցուցմունքում ասել, որ Զոհրաբյանը մասնակցել է, իսկ հիմա հերքում է, Միհրանյանը պատճառաբանեց, որ նախաքննության ողջ ընթացքում ոչ սթափ վիճակում է եղել: Ըստ նրա՝ նույնիսկ ներքին դիտման ժամանակ ալկոհոլ է օգտագործած եղել, դեպքին նախորդող օրերին էլ է ալկոհոլ օգտագործել, ճանապարհին էլ է խմել, ու ոչ սթափ վիճակում իրենից ցուցմունք են վերցրել, որի ժամանակ ինքը նկարագրել է Գեւորգ Զոհրաբյանի մասնակցությունը տվյալ հանցագործությանը:
Միհրանյանի պաշտպան Մարինե Ֆարմանյանը Aravot.am-ին ասաց՝ գործով ապացույցներ են հետազոտվել, որտեղ երեւում է Գեւորգ Զոհրաբյանի մասնակցությունը. «Նա եղել է ե՛ւ դեպքի վայրում, ե՛ւ դեպքի ողջ ընթացքում հեռախոսների ալեհավաքներ հսկել են, հետո Կարեն Վարդանյանին տեղափոխած մեքենայի հարդարման աշխատանքների կատարման ժամանակ, երբ դիմել են արհեստավորի, նրանք միասին են եղել: Կան փաստեր, որոնք Զոհրաբյանի մասնակցությունը հաստատում են, թե դատարանը դրանց ինչ գնահատական կտա, դատավճռով կտեսնենք»:
Թե ինչու իր պաշտպանյալը՝ Արթուր Միհրանյանը, այսօր դատարանում ամբողջ մեղքն իր վրա վերցրեց, փաստաբանը չցանկացավ գնահատական տալ, միայն ասաց. «Նա է որոշում՝ ինչ ցուցմունք տալ, ինչպես փոխել իր ցուցմունքները, բայց, այո՛, ստացվում է այնպես, որ նա այսօր իր նախաքննական ցուցմունքներին տրամագծորեն հակասող ցուցմունք տվեց»:
Արփինե ՍԻՄՈՆՅԱՆ
