Ազդարարներին պաշտպանության համար արդարադատության նախարարությունը կառավարությանն առաջարկում է հաստատել արտաբյուջետային նախահաշիվը, որը կազմում է 25 միլիոն դրամ:
Այս մասին տեղեկանում ենք կառավարության նիստի օրակարգից:
Որոշման նախագծից տեղեկանում ենք նաեւ, որ այս տարվա հուլիսի 31-ին ՀՀ արդարադատության նախարարության եւ Մեծ Բրիտանիայի եւ Հյուսիսային Իռլանդիայի Միացյալ Թագավորության կառավարության միջեւ կնքվել է «Աջակցություն Հայաստանի կառավարությանը հակակոռուպցիոն ռազմավարության իրականացման գործում՝ ընդլայնելու օրենսդրական եւ կարգավորող դաշտը ազդարարների արդյունավետ պաշտպանության համակարգին աջակցելու նպատակով» դրամաշնորհային ծրագրի իրականացման մասին փոխըմբռնման հուշագիր: Ծրագիրն իրականացնում է արդարադատության նախարարության «Դատաիրավական ԾԻԳ» պետական հիմնարկը: Ինչի համար էլ բացվում է վերոնշված նախահաշիվը:
Հիշեցնենք, որ դեռ անցյալ տարի ՀՀ վարչապետ Կարեն Կարապետյանը կառավարության նիստերից մեկում ասել էր, որ գործադիր իշխանությունների համակարգում պետք զարգացնել ազդարարների համակարգը, ինչի ուղղությամբ էլ հանձնարարականներ էր տվել։ Վարչապետն ասել էր, օրինակ՝ արտասահմանում գործում է ազդարարների ինստիտուտը, ազդարարները տեղեկացնում են պետական մարմինների աշխատանքում թերացումների մասին։ Ազդարարների համակարգի ներդրումը նաեւ Կարապետյանի կառավարության ծրագրային դրույթներից է:
Ըստ կառավարության որոշման նախագծի, «Ազդարարների պաշտպանության ծրագրի նպատակն է աջակցել կառավարությանը հակակոռուպցիոն ռազմավարության իրականացմանը ազդարարների պաշտպանության մասով՝ ազդարարներին հնարավորություն ընձեռելով հաղորդել կոռուպցիոն ռիսկերի մասին պաշտպանված եղանակով եւ աջակցել հանրային իրազեկմանն ուղղված գործունեությանը կոռուպցիայի դեմ պայքարի ոլորտում՝ ընդգրկելով նաեւ ազդարարների պաշտպանության համակարգը»:
Նելլի ԲԱԲԱՅԱՆ
