«Ծառուկյան» խմբակցության պատգամավոր Լուիզա Սարգսյանն այսօր ԱԺ հայտարարությունների ժամին խոսեց ինքնասպանությունների մասին: Ըստ նրա, վերջին շրջանում Հայաստանում ինքնասպանությունների թիվը անհանգստացնում է:
ԱՀԿ-ի տվյալներով էլ՝ մինչեւ 2020-ը ինքնասպանությունների թիվը կմեծանա, այժմ տարեկան 1 մլն մարդ աշխարհում ինքնասպան է լինում: ԱԻՆ-ի տվյալներով՝ ՀՀ-ում 2017-ի առաջին 7-8 ամիսներին 117 ինքնասպանություն է կատարվել, 278 փորձ է կատարվել ինքնասպանության, 18-ի դեպքում քաղաքացիները սպառնացել են ինքնասպան լինել: Մեր երկրում օրական միջինը գրեթե 2 մարդ մտադրություն ունի ինքնասպան լինել: Սա ըստ Լուիզա Սարգսյանի, խոսում է այն մասին, որ հասարակությունը ոչ միայն ավելի է աղքատացել, այլեւ հայտնվել է թշվառության ճիրաններում:
Ինքնասպանությունների հիմնական պատճառը սոցիալական խնդիրներն են. «Մարդիկ ոչ միայն վատ են ապրում, այլ նաեւ կորցրել են հավատը, նույնիսկ 90 ականներին հայ հանրությունը այսքան հուսալքված չի եղել: 2018-ին էլ չի ակնկալվում նվազագույն աշխատավարձի, թոշակների բարձրացում: ՀՀ-ում կայուն գերեզմանատան վիճակ է»:
Պատգամավորը խոսեց ընկճախտի՝ դեպրեսիայի մասին՝ հիշեցնելով, որ ըստ Աստվածաշնչի, ինքնասպանությունը ծանր մեղք է համարվում:
Հռիփսիմե ՋԵԲԵՋՅԱՆ
