Շենգավիթ վարչական շրջանի ընդհանուր իրավասության դատարանում այսօր ծննդկան Մերի Մարգարյանի եւ նրա նորածնի մահվան գործով (դեպքը տեղի է ունեցել 2015թ.) դատական նիստը տեւական ընդմիջումից հետո վերսկսվեց:
Հիշեցնենք, որ Մարգարյանի մահվան մեջ մեղադրվում են Շենգավիթ ԲԿ բժշկուհիներ Շուշանիկ Բախշյանը, որը վարել է հղիությունը եւ հերթապահ-բժիշկ Անի Բաբելյանը:
Դատարանի որոշմամբ՝ մոտ 2,5 ամիս առաջ Մերի Մարգարյանի հիվանդության պատմության եւ կից փաստաթղթերն ուղարկվել էին թարգմանչական կազմակերպությանը՝ ռուսերենից հայերեն թարգմանելու համար:
Դատավոր Դավիթ Բալայանն արձանագրեց, որ ստացված փաստաթղթերը թերի են թարգմանված. բժշկական ձեռագրերից որոշները մակագրված են «անընթեռնելի», որոշներն էլ պարզ չէ, թե որ բնօրինակից են թարգմանվել: «Թարգմանչական կազմակերպությունն անգործության է վերածել այս ամենը եւ արել է այն, ինչ ունենք»,-դժգոհեց դատավորը:
Մեղադրող-դատախազ Մնացականյանը կարծիք հայտնեց, որ կարելի է փաստաթղթերը կրկին ուղարկել թարգմանության:
Ամբաստանյալ Շուշանիկ Բախշյանի շահերի պաշտպան, փաստաբան Ալեքսանդր Սիրունյանն էլ պնդեց, որ այդ փաստաթղթերը թերի ապացույցներ են, եւ դա դատախազի խնդիրն է. «Թերի բերված ապացույցն ուզում եք շտկե՞լ»:
Դատավոր Դավիթ Բալայանը որոշեց փաստաթղթերը հետ ուղարկել թարգմանչական կազմակերպությանը՝ նշումով, որ դատարանի նախորդ պահանջը կատարված չէ: Դատաքննությունը հետաձգվեց: Հաջորդ նիստի օրը դեռեւս պարզ չէ եւ կախված է փաստաթղթերի թարգմանության ժամկետի հետ:
Լուիզա ՍՈՒՔԻԱՍՅԱՆ
