Խորհրդարանում քննարկվում է «Ելքի» առաջարկը՝ ԵԱՏՄ-ից դուրս գալու եւ ժամանակավոր հանձնաժողով ստեղծելու մասին:
ԱԺ փոխխոսնակ Էդուարդ Շարմազանովն ասել էր, որ միայն ԵԱՏՄ մտնելուց հետո ՀՀ արդյունաբերողների համար գազի գինը 30 դոլարով պակասել է:
ՀՀԿ խմբակցության պատգամավոր Արտաշես Գեղամյանն էլ նշեց իր հաշվարկները՝ ԵԱՏՄ-ից դուրս գալու վնասների մասին. «Անցյալ տարի ՀՀ-ն ներկրել է 1 մլրդ 900 մլն խմ գազ՝ 1000 խմ-ի դիմաց սահմանի վրա 150 դոլար սակագնով: Եթե դուրս ենք գալիս, անվերապահորեն գազի գինը կհավասարեցվի ԱՊՀ մնացած երկրների, դիցուք՝ Մոլդովայի գազի գնին՝ 339 դոլար է, առնվազն 190 դոլարով ավելի շատ փող կտանք՝ 1000 խմ-ի դիմաց: Դա անում է տարեկան 360 մլն դոլար: Այդ 360 մլն դոլարը կընկնի մեր արտադրողների, էներգետիկների եւ ազգաբնակչության ուսերին, բնականաբար, գազի սակագները կբարձրանան: Էլեկտրաէներգիայի սակագինը բարձրանալով՝ մեր ապրանքների մրցունակությունը շեշտակիորեն կընկնի: Դա իր հետեւից կբերի արտադրության սեղմում: Դա իր հետեւից կբերի գործազրկության աճի՝ դրանից բխող բոլոր բացասական հետեւանքներով»:
Գեղամյանը նշեց, որ այլ հարց է, որ Հայաստանը ԵՏՄ-ին անդամակցելով՝ լիարժեքորեն չի օգտագործում այն վիթխարի պոտենցիալը, որ կա. «Եթե սա քննարկենք եւ մեր տագնապները հաղորդենք մեր գործընկերներին, օգուտ կունենանք»:
Հռիփսիմե ՋԵԲԵՋՅԱՆ
