Խորհրդարանում քննարկվում է «Ելքի» առաջարկը՝ ԵԱՏՄ-ից դուրս գալու եւ ժամանակավոր հանձնաժողով ստեղծելու մասին:
«Ելքի» պատգամավոր Արամ Սարգսյանն իր ելույթում ասաց. «Դուք այսօր կարող եք փառաբանել աշխարհի եվրասիական հատվածը, որտեղ երկրային դրախտ է, որի դուռը միայն ձեր համար արդարացված, իմաստուն գիշերային որոշումով բացվեց Հայաստանի առաջ: Ձեզանից որեւէ մեկը կասի՞, թե ՀՀ-ում քանի երեխա չի ծնվել, որովհետեւ տան տղամարդը մեկնել է արտագնա աշխատանքի, քանի երեխա է մեծանում որբի կարգավիճակով՝ նույն պատճառով, քանի կին է ստիպված տան տղամարդ դարձել, քանի փակ ու բաց դագաղ է Հայաստան եկել եւ քանի տան դուռ է ՀՀ-ում փակվել»:
Նա ասաց, որ ուզում են հայը մնա ՀՀ-ում, ոչ թե օտար աշխարհներ գնա եւ պատանդ դառնա՝ պատանդ դարձնելով նաեւ իր ընտանիքն ու հայրենիքը. «Մենք մեր հայրենիքը չենք տեսնում սպասարկման ոլորտում կամ առավելագույնը՝ հումք արտահանող: Մենք մեր հայրենիքում ուզում ենք արդյունաբերություն վերականգնել ու գյուղատնտեսությունը չդարձնել լոլիկի, ծիրանի, կամ էլ խաղողի գերի: Դուք ասում եք՝ փոփոխություններն անհնարին են, մենք ասում ենք հնարավորությունների տեղը, դուք անլիարժեքության բարդույթ եք զարգացնում՝ փոքր ու աղքատ երկիր լինելու, չավարտված պատերազմների, հարեւանների եւ էլի այլ պատճառներով: Մենք ասում ենք՝ ելք կա եւ ելքը մեր մեջ է»:
Ըստ Արամ Սարգսյանի, ՀՀ-ն անկախ պետություն երբեք չի լինի, քանի ունի կախյալ իշխանություն, որի երազանքների գագաթնակետը ՌԴ-ի անվան Հայաստանի Հանրապետություն դառնալն է. «Մեր անկախությունն ավարտվեց 1999-ի սեպտեմբերի 21-ին՝ Հանրապետության հրապարակի շքերթում եղբորս հպարտության արցունքներով եւ հոկտեմբերի 27-ին այս դահլիճում կատարված սպանություններով: Դրանից հետո ձեր ընթացքը եղել է՝ ամեն ինչ իշխանության դիմաց կարգախոսով: Այդպես հանձնել եք շարժական ու անշարժ գույք, տնտեսություն, ընդերք, անվտանգություն, երկինք: Այստեղ քննարկվում է ՀՀ անկախության հարցը եւ մեծամասնությունը խրոխտ ոչ է ասում անկախությանը, սա է իրականությունը»:
Հռիփսիմե ՋԵԲԵՋՅԱՆ
