«Եվրոպական կառույցների համար ակնհայտ է, ո Արեւելյան գործընկերությունը ԵՄ օրակարգում բարձր հորիզոնականում պահելն առաջնահերթություն է: Լիահույս սպասում ենք առաջիկա հաջող գագաթնաժողովին, որը նոր խթան կլինի Արեւելյան գործընկերության համար եւ ցույց կտա շոշափելի արդյունքներ»,-ԵՄ-Հայաստանի քաղաքացիական հասարակություն համագործակցության խմբի (որում ընդգրկված են ՀՀ քաղհասարակության ներկայացուցիչներ) հավաքի ժամանակ այսօր հայտարարեց Հայաստանում ԵՄ պատվիրակության ղեկավար, դեսպան Պյոտր Անտոնի Սվիտալսկին:
Հիշեցնենք, որ նոյեմբերի 24-ին Բրյուսելում կկայանա Եվրամիության Արևելյան գործընկերության (ԱլԳ) գագաթնաժողովը, որի ընթացքում էլ նախատեսվում է ԵՄ-ի և Հայաստանի միջև Համապարփակ և ընդլայնված գործընկերության համաձայնագրի ստորագրումը:
«Կարծում եմ՝ կառուցողական արդյունք ստանալու ակնկալիք ունեն նաեւ հայաստանյան գործընկերները: Տարածաշրջանին ուշադրություն է պետք դարձնել: Մայրցամաքի արեւելյան մասին պետք է ավելի սերտ ներգրավել ԵՄ գործունեությանը: Արեւելյան մասը նաեւ ֆինանսական օժանդակության կարիք ունի»,-համոզմունք հայտնեց Պյոտր Սվիտալսկին: Նրա բնորոշմամբ՝ եվրոպական գործընկերների եւ հայաստանյան գործընկերների կարծիքները համընկնում են առ այն, որ գագաթնաժողովը չափազանց մեծ կարեւորություն ունի:
ԵՄ դեսպանը նաեւ նշեց, որ այդ հարցում կարեւոր է ՀՀ քաղաքացիական հասարակությունը. «Մենք օժանդակում ենք Ձեզ, Դուք էլ կարող եք շարունակել ակնկալել այդ օժանդակությունը, քանի որ այս հավաքն արդյունավետ նպատակի է ծառայում»:
Պյոտր Սվիտալսկին առանձնացրեց նաեւ Եվրոպական հանձնաժողովի հարևանության և ընդլայնման հարցերով հանձնակատար Յոհանես Հաանի այցը Հայաստան. «Նա հույս է կապում քաղաքացիական հասարակության ներկայացուցիչների հետ եւ ակնկալում է, որ վերջիններս ակտիվ կլինեն»:
Լուիզա ՍՈՒՔԻԱՍՅԱՆ
