Եվրահանձնաժողովը անօրինական է ճանաչել Կատալոնիայում անցկացված անկախության հանրաքվեն՝ միաժամանակ կոչ անելով Իսպանիայի իշխանություններին՝ երկխոսություն սկսել Կատալոնիայի անկախության կողմնակիցների հետ, հաղորդում է BBC-ն:
«Իսպանիայի սահմանադրության համաձայն՝ Կատալոնիայում երեկ տեղի ունեցած քվեարկությունը անօրինական էր»,- Բրյուսելում տեղի ունեցած մամուլի ասուլիսում հայտարարել է Եվրահանձնաժողովի պաշտոնական ներկայացուցիչ Մարգարիտիս Սխինասը:
Եվրահանձնաժողովի կարծիքով՝ Կատալոնիայի անկախությունն Իսպանիայի ներքին գործն է, որը պետք է որոշվի համաձայն Իսպանիայի սահմանադրության: Միաժամանակ Եվրահանձնաժողովում հիշեցրել են, որ «բռնությունը երբեք չի կարող լինել քաղաքականության գործիք»:
Սխինասը կողմերին երկխոսության կոչ է արել՝ հիշեցնելով, որ երկուշաբթի Եվրահանձնաժողովի նախագահ Ժան-Կլոդ Յունկերը Կատալոնիայում ծավալված իրավիճակը կքննարկի Իսպանիայի վարչապետ Մարիո Ռախոյի հետ:
Հիշեցնենք, հոկտեմբերի 1-ին Կատալոնիայում տեղի ունեցավ անկախության հանրաքվե: Իսպանիայի իշխանությունները չեն ճանաչում հանրաքվեի արդյունքները՝ պատճառաբանելով, որ այն հակասում է Իսպանիայի սահմանադրությանը:
Պատրաստեց՝ Վիկտորյա ԱՆԴՐԵԱՍՅԱՆԸ
