«Երկիր Ծիրանի» կուսակցության նախագահ Զարուհի Փոստանջյանը Անգեղակոթ գյուղում է: Նա մտել է հողատարածքներ եւ կարտոֆիլագործներին տեղեկացնում է համահայկական ընդվզման օրվա մասին: Հողագործները, տեսնելով հեռախոսով նկարահանումը՝ նախ Փոստանջյանից հետաքրքրվեցին՝ «Էս սելֆի՞ ես անում»: Փոստանջյանը բացատրեց, որ սա սելֆի չէ, ուղիղ եթերն է՝ ֆեյսբուքով:
Երբ Փոստանջյանն ասաց, որ ընդվզման օրը ձեռք ձեռքի պետք է բռնեն բոլորը՝ նույն օրը, նույն ժամին, անգեղակոթցիներից մեկն այլ առաջարկ արեց Փոստանջյանին. «Հիմա կարա՞նք ձեռք ձեռքի բռնած՝ էս կարտոշկեն հավաքենք»:
Փոստանջյանը հողագործներին հարցրեց. «Հը՞, սկսելո՞ւ եք ընդվզել, թե՞ հնազանդ եք լինելու»: Նրանք արձագանքեցին. «Ո՞ւմ, Սերժի՞ն, բացառվում է»: Գյուղացիներն ասացին, որ բողոքն իմաստ չունի, ո՞ւմ բողոքենք, Փոստանջյանն էլ հողագործներին ոգեւորելու մեկ այլ ձեւ գտավ. «Տեսա՞ք Կատալոնիան ոնց ինքնորոշվեց, տեսնո՞ւմ եք Քրդստանը ոնց է պետություն դառնում, քուրդը ոնց է պետականություն ստեղծում, բա մենք մեր պետականությունը կորցնե՞նք»:
Անգեղակոթցիներն ասացին. «Սահմանամերձ գոտի է, ո՞վ է մեզ հաշվի առնում»: Բնակիչներին հուզում էր միայն իրենց կարտոֆիլի հարցը. «Ժողովրդի վիճակը կարտոլ ա, էդ էլ չեն առնում»: Իսկ Փոստանջյանը խոսում էր համահայկական ժողովի, պատվիրակ ընտրելու մասին. «Հենց արդար կարգեր լինեն՝ գումարն էլ կգա, մարդիկ այստեղից չեն փախչի»:
Զրույցի ընթացքում գյուղացիներից մեկը հայտնաբերեց, որ Փոստանջյանի մեջ «անգեղակոթցու արյուն կա: Կարող ա մի քիչ փորփրենք՝ իրար բարեկամ էլ լինենք»:
Հռիփսիմե ՋԵԲԵՋՅԱՆ
