Հայաստան այցելած Եվրոպական հանձնաժողովի հարևանության և ընդլայնման հարցերով հանձնակատար Յոհանես Հանն այսօր ՀՀ ԱԳՆ-ում լրագրողների հետ հանդիպմանն ամփոփեց նախարար Էդվարդ Նալբանդյանի հետ բանակցությունների արդյունքները: Նա փաստեց, որ Եվրոպական միության օժանդակությունը Հայաստանի զարգացմանն ավելի տեսանելի է դառնում. «Մեր շահերից է բխում ունենալ կայուն եւ բարեկեցիկ Հայաստան` Հարավային Կովկասում»:
Անդրադառնալով նոյեմբերին ստորագրվելիք ՀՀ-ԵՄ համապարփակ եւ ընդյալնված գործընկերության համաձայնագրին՝ Յոհանես Հանը համոզմունք հայտնեց, որ այն կամրապնդի եւ կխորացնի Հայաստանի եւ Եվրամիության միջեւ գործակցությունը. «Սա առաջին համաձայնագիրն է իր բնույթով: ՀՀ-ն այս առումով առաջամարտիկ է Արեւելյան գործընկերության երկրների թվում, ուստի շահագրգիռ ենք տեսնելու, թե համաձայնագիրն ինչպես է իրագործվելու: Այն կարող է օրինակ ծառայել հետագա հարաբերութունների համար: Համաձայնագրի նշանակությունն ավելին է, քան երկկողմ հարաբերությունները: Այն բեկումնային է եւ կօգնի ցույց տալ, որ ՀՀ-ն կարող է մասնակից լինել ԵՄ-ի հետ գործընկերությանը»:
Յոհանես Հանի խոսքով. «Կաջակցենք Հայաստանին՝ բարելավելու իր գործունեությունն առեւտրի, ծառայությունների, պետական գնումների, մտավոր սեփականության իրավունքների ոլորտներում: Համաձայնագիրը կապահովի նաեւ շրջանակներ՝ այնպիսի ոլորտների համար, որոնցում մտադիր ենք ներդրումներ անել: Կուզենայինք կենտրոնանալ կրթության եւ նորարարության վրա»:
Պաշտոնյան հավաստիացրեց, որ ԵՄ-ն շարունակելու է օժանդակել ՀՀ տնտեսվարողներին. «Տեղական արժույթով վարկեր ստանալու հնարավորությունը կարեւոր է ՓՄՁ-ների համար: Հերթական կարեւոր արդյունքը բիզնես ոլորտի համար դա կարող է լինել»:
Յոհանես Հանը նաեւ կարծիք հայտնեց, որ ՀՀ-ԵՄ հարաբերություններն ավելի են բարելավվել. «Այս տարի Հայաստանում կայացած ընտրությունները դրա վկայությունն են: Լրացուցիչ առաջընթաց, իհարկե, հնարավոր է, պետք է հասնել դրան: Բոլորիս շահերից է բխում կայուն հարեւանությունը: Դա կբերի խաղաղություն, բարեկեցություն: Քաղաքացիներն արժանի են դրան»:
Հիշեցնենք, որ Յոհանես Հանը բացառիկ հարցազրույց է տվել «Առավոտ»-ին:
Լուիզա ՍՈՒՔԻԱՍՅԱՆ
