«Խի չե՞նք կորցրել Հայաստանը»,- Վայքում բնակիչներն այսպես արձագանքեցին «Երկիր Ծիրանի» կուսակցության նախագահ Զարուհի Փոստանջյանին, երբ վերջինս համահայկական ընդվզման օրվա մասին իրազեկելով՝ ասաց, որ կորցնում ենք Հայաստանը»:
Փոստանջյանն ասաց. «Շատ բան ենք կորցրել, բայց այս աղետալի վիճակը պետք է շտկենք», բնակիչներն արձագանքեցին. «Մենք ոչ մի բան չենք կարող անել»:
Զարուհի Փոստանջյանը սկսեց բնակիչներին «դուխ տալ», թե՝ «Պարտավոր եք ինքնակազմակերպվել, մեզ ի՞նչ է եղել, որ չկարողանանք մեր իշխանությունը իրագործել, վերջիվերջո ազգ ենք, քոչվոր չենք, որ այստեղ-այնտեղ ապրենք: Քիչ բան չունենք, 42 հազար կմ պատմական հայրենիք ունենք, ճիշտ է, 10 տոկոսն է մնացել, բայց կարող ենք պայքարել: Պարտավոր ենք, փոխողը մենք ենք, ամեն մեկս մեր տեղում պետք է գործ անենք»:
Վայքի բնակիչներն առաջարկեցին. «Մեր տեղում գործ անելով չի, գնացեք սփյուռքահայերին ասեք, որ թող գան հրապարակում նստեն, ոչ թե ինտերնետում նկարվեն ու գցեն»:
Փոստանջյանն ասաց, որ համահայկական ընդվզման օրը պետք է տեղի ունենա աշխարհի բոլոր հայաշատ քաղաքներում, սփյուռքահայերն էլ պետք է մասնակցեն. «Մի հատ մենք պետք է ցույց տանք մեր ուժը, բռունցքը բոլոր քաղաքներում»: Վայքի բնակիչները պատկերացրեցին, թե ինչ կարող է լինել համահայկական այդ ընդվզման օրը. «Մարտի 1 են սարքելու էս խեղճ ժողովրդին, ուժն իրենց ձեռքն է…Մի մարդուն 5 ոստիկան է հասնում, ո՞նց է լինելու»:
Փոստանջյանը պատասխանեց. «Ոստիկանները պետք է օգնեն Սերժ Սարգսյանին Բաղրամյան 26-ում: Մի քանի օր առաջ Սերժ Սարգսյանը Արագածոտնի մարզում էր, հարսանիքի էր, ողջ ոստիկանական համակարգը տարել էր Արագածոտնի մարզ, որպեսզի մասնակցեր հարսանիքի, ոստիկանները հարյուր մետրի վրա կանգնած էին: Իրեն սպասարկելու համար այդ ոստիկաները կհերիքեն, բայց եթե բոլորս դուրս գանք փողոց՝ չեն հերիքի: Նույն ոստիկանը, որ տեսավ ժողովրդի բռունցքը, զենքը վայր է դնելու»:
Վայքի բնակիչները պատասխանեցին. «Շատ մի նեղվեք՝ Ղարաբաղից կբերեն»: Զարուհի Փոստանջյանն էլ պատասխանեց. «Գիտեք արցախահայությունը գո՞հ է այս կարգերից: Նույնիսկ եթե բերեն էլ՝ չպետք է վախենաք, մի վախեցեք, որովհետեւ կորցնում ենք հայրենիքը: Եթե բոլորս ձեռք ձեռքի բռնած կանգնած լինենք, էդ իր ոստիկանը ո՞ւմ վրա կարող է ազդել, ոչ մեկի»:
Հռիփսիմե ՋԵԲԵՋՅԱՆ
