Կատալոնիայի նախագահ Կարլոս Պուչդեմոնը հայտարարել է, որ հանրաքվեի արդյունքում իրենք անկախ պետություն հայտարարելու իրավունք ունեն:
Պուչդեմոնի խոսքով՝ հանրաքվեն ցույց է տվել, որ կատալոնացիների ցանկանում են ապրել խաղաղ՝ դուրս այն պետությունից, որը կոշտ ուժ է կիրառում քվեարկությունը խափանելու համար:
Պուչդեմոնը չի նշել հանրաքվեի նախնական արդյունքները կամ քվեարկությանը ընտրողների մասնակցությունը, սակայն առանձին տեղամասերի տվյալները ցույց են տալիս, որ անկախությանը կողմ է քվեարկել հանրաքվեի մասնակիցների 85-95 տոկոսը:
Կատալոնիայի նախագահի կարծիքով՝ Իսպանիայի իշխանությունները ցույց տվեցին, որ պատրաստ են բռնությունների դիմել կատալոնացիների նկատմամբ: «Մենք Եվրոպայի բնակիչներ ենք»,- ընդգծել է Կատալոնիայի նախագահը:
Պուչդեմոնի ելույթից առաջ հանդես էր եկել Իսպանիայի վարչապետ Մարիանո Ռախոյը՝ հայտարարելով հանրաքվեի տապալման մասին: Նա նշել էր, որ Կատալոնիայի բնակիչներն արհամարհել են հանրաքվեն՝ ցույց տալով, որ «արժանի քաղաքացիներ» են:
Պատրաստեց՝ Վիկտորյա ԱՆԴՐԵԱՍՅԱՆԸ
