ՀՀ ռազմարդյունաբերության զարգացման ուղղությամբ վերջին մեկ տարում քայլեր ձեռնարկվել են: Մասնավորապես, մարտական ծառայության մեջ ներդրվել են ՀՀ-ում արտադրված միջոցներ, որոնք կարեւոր են մարտական հերթապահության իրականացման տեսանկյունից: Այս մասին այսօր ՀՀ պաշտպանական գերատեսչությունում լրագրողների հետ հանդիպմանն ասաց Պաշտպանության նախարար Վիգեն Սարգսյանը: Նրա բնորոշմամբ՝ այդ միջոցները ոչ միայն գնային առավելություն ունեն, այլեւ առաջին քայլն են դեպի հիմնական նպատակ՝ ռազմական արդյունաբերությունը տնտեսության շարժիչներից մեկը դարձնելը:
«Նախատեսվում է, որ հնարավորություն կունենանք միջազգային շուկայում դառնալու ոչ միայն զենք ներկրող երկիր, այլեւ բարձր տեխնոլոգիաներով ստացված միջոցներ արտահանող երկիր: Դա կարեւոր է նաեւ գիտական ներուժի օգտագործման համար»,-նշեց Վիգեն Սարգսյանը:
Նա նաեւ հայտնեց, որ մինչեւ տարեվերջ ամբողջությամբ լուծված կլինի զոհված զինծառայողների եւ առաջին կարգի հաշմանդամություն ունեցող զինծառայողների անօթեւան ընտանիքների՝ բնակարանով ապահովման խնդիրը. ««Տարիներ շարունակ կուտակել ենք ցուցակ, պարտավոր էինք որոշումներ կայացնել: Օրերս Երեւանի անօթեւան ընտանիքները կստանան բնակարանի վկայականներ, համաձայն որոնց՝ առաջիկա մեկ տարում նորակառույց շենքերում ձեռք կբերեն բնակարաններ»:
Լուիզա ՍՈՒՔԻԱՍՅԱՆ
