«Մանրուք», «ստից բան»` այսպես է թարգմանվում անգլիական այս աղանդերի անունը, եւ իսկապես թրայֆլն այնքան հեշտ եւ արագ է պատրաստվում եւ այնքան համեղ է, որ չես էլ հասցնում նկատել` երբ պատրաստեցիր եւ երբ կերան:
Թրայֆլի բաղադրատոմսերը հազարավոր են, սակայն կան որոշակի կանոններ` պատրաստի մթերքները դասավորվում են շերտ առ շերտ, եւ իրար հետ համադրվում են բիսկվիթը կամ թխվածքաբլիթը, որեւէ ալկոհոլ կամ մրգահյութ եւ կրեմը: Կարելի է ավելացնել նաեւ ըստ ճաշակի` ընկուզեղեն, մրգեր կամ հատապտուղներ, բեզե, կոնֆետներ եւ այլն:
Այսօր առաջարկում եմ ամենապարզ եւ արագ տեսակներից մեկը:
Անհրաժեշտ մթերքները
Պատրաստի կեքս (կարելի է վերցնել երկու գույնի)-2 հատ
33 եւ ավելի տոկոսանոց կաթնասեր-0,5 մլ
Շաքարի փոշի-1 բաժակ
Որեւէ լիկյոր-1 բաժակ
Ազնվամորու կամ ելակի մուրաբա (կամ ջեմ)- 1 բաժակ
Շոկոլադ-50 գրամ
Պատրաստման եղանակը
Թրայֆլը կարելի է պատրաստել ինչպես մեկ ընդհանուր, մեծ ամանի մեջ, այնպես էլ` բաժակների կամ պաղպաղակի ամանների մեջ. յուրաքանչյուրին` մեկ բաժին հաշվարկով: Կարեւորը, որ լինի թափանցիկ ապակի, որպեսզի շերտերը գեղեցիկ երեւան:
Կարող եք ոչ թե կեքս վերցնել, այլ որեւէ չոր թխվածքաբլիթ, կամ սովորական պարզ բիսկվիթ, որը պատրաստել եք երեկ կամ առաջին օրը եւ այսօր արդեն մի քիչ չորացել է: Կրեմն էլ կարող եք ձեր նախընտրածը պատրաստել եւ ոչ թե սերուցքը խփել:
Եթե պատրաստում եք առանձին բաժիններով, ապա կեքսերը (եթե մեկը լինի շոկոլադե, մյուսը` վանիլային, ավելի գեղեցիկ կստացվի) շերտատեք, իսկ բաժակի մեջ հարմար մտցնելու համար ամեն շերտը նաեւ բաժակով կամ որեւէ շրջանաձեւ ֆորմայով կտրատեք: Ավելացած մասերը կարող եք փշրել` վերջում զարդարելու կամ փշուրներով շերտ դարձնելու համար:
Կրեմը պատրաստելու համար լավ հարեք սերուցքը, ավելացրեք շաքարի փոշին: Բաժանեք երեք մասի, մի մասին ավելացրեք 1-2 ճաշի գդալ մուրաբա կամ ջեմ, մյուս մասին ավելացրեք հալեցրած կամ քերած շոկոլադ կամ պարզապես նուտելա, իսկ երրորդ մասը թողեք մնա սպիտակ:
Սկսեք հավաքել ձեր աղանդերը: Բաժակի հատակին դրեք բիսկվիթը, վրան ցողեք մոտ մեկ թեյի գդալի չափ լիկյոր, դրեք 1 ճաշի գդալ սերուցքային կրեմ, ցանկության դեպքում` մի քիչ աղացած ընկույզ, մուրաբա կամ թարմ հատապտուղ: Այսքանից հետո` շերտերը կրկնվելու են` կեքս, լիկյոր, կրեմ, մրգային շերտ… Շերտերը կարող են լինել այնքան, որքան ձեր բաժակը կամ մեծ տարան կտեղավորի:
Պատրաստի աղանդերները զարդարեք մանրած ընկույզով, թարմ հատապտուղներով կամ մուրաբայով: Մատուցեք անմիջապես: Եթե հարած սերուցքի փոխարեն այլ կրեմ եք օգտագործել` եփած կրեմ կամ խտացրած կաթով կրեմ, կարող եք դնել սառնարան մի քանի ժամով, նոր մատուցել:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
