Երեկ Ջրային տնտեսության պետական կոմիտեի նախագահ Արսեն Հարությունյանը հայտարարեց, որ այս տարի ոռոգման ջուրն «էկոնոմ» ռեժիմով են տվել: Նա նաեւ խոստովանեց՝ «էկոնոմ» ռեժիմի արդյունքում որոշ հողատարածքներում խնդիրներ են ունեցել: Ինչ խոսք, ողջունելի է ոլորտի նախագահի ազնվությունը, բայց ո՞վ է փոխհատուցելու տուժած գյուղացիներին, որոնք վարկով ներդրումներ են արել՝ բերք ստանալու ակնկալիքով: «Առավոտի» այս հարցին ոլորտի «նախագահը» սառնասրտորեն պատասխանեց. «Որ ջուր չի եղել, որտեղի՞ց տայինք»: Իսկ փոխհատուցման մասին՝ ոչ մի խոսք:
Լուսանկարում Արմավիրի մարզի Սարդարապատ համայնքի բնակչի վնասված բերքն է. այգիներն ու տնկիները չորացել են, ՋՕԸ-ն ջուր չի տվել: Գյուղացին մեծ ծախսեր է արել, հողը մշակել, սպասում էր 7 տոննա խաղողի, 120 տոննա լոլիկի բերքի, բայց դրա 10%-ն էլ չի կարող ստանալ:
«Ձմերուկ, եմիշն էլ խանձվեց, թափվեց: 7 տոննա խաղողից հազիվ 2 տոննա ստանամ: Ջրի պարտք չունեմ, հիմա իմ պարտքերն ու վարկերն ո՞վ է փակելու, ՋՕԸ-ը, որ ջուր չի տվել, կփակի՞»,- ասում էր գյուղացին:
Լուսանկարները՝ Նելլի Բաբայանի
«Առավոտ» օրաթերթ
29.09.2017
