Տատը պնդում է, որ իր կողմից զուգարանի փոսը նետված նորածինը մահացած է  եղել

Դեպքի առթիվ նշանակվել են մի շարք փորձաքննություններ

Տավուշի մարզի Բերդի տարածաշրջանի գյուղերից մեկում 33-ամյա կինը  36-37 շաբաթական հղիություն է  ունեցել: Նա իրենց առանձնատանը ծննդաբերել է, սակայն նրա մայրը նորածնի մարմինը գցել է իրենց տանը կից  զուգարանի փոսը: Ծննդաբերած կինը ծննդաբերության հետեւանքով արյունահոսություն է ունեցել, բուժօգնության համար դիմել է հիվանդանոց:

Իրավապահներից ստացված տեղեկություններով՝ ծննդաբերած կնոջ մայրն ասել է, որ պտուղը մահացած է ծնվել:

Դեպքի կապակցությամբ նշանակվել են մի շարք փորձաքննություններ:

Պտուղը զուգարանը նետած կնոջն առաջիկայում  մեղադրանք կառաջադրվի ՀՀ քրեական օրենսգրքի 109 հոդվածով (« Անզգուշությամբ  մահ պատճառելը»): Սույն հոդվածը նախատեսում է առավելագույնը  3 տարի  ժամկետով ազատազրկում:

Ոսկան ՍԱՐԳՍՅԱՆ