ՀՊՃՀ պրոռեկտոր, 1990–1992 թթ. ՀՀ Լուսավորության նախարար Արեգ Գրիգորյանն այսօր ՀՀ Հանրային խորհրդում ռուսաց լեզվի հայեցակարգի քննարկման ժամանակ կարծիք հայտնեց, որ ռուսերենը Հայաստանում եղել է հալածվածի կարգավիճակում եւ, առհասարակ, հստակ կարգավիճակ չի էլ ունեցել:
«Բուհերում ռուսերենն օտար լեզու չի համարվել քննություն հանձնելուց: Դա դրվել է այն նպատակով, որ այլ օտար լեզուներ սովորեն, օրինակ՝ անգլերեն: Միշտ առանձնացրել ենք ռուսերենը, բայց դրանով չենք նպաստել դրա զարգացմանը, այլ վնասել ենք լեզուն»,-համոզմունք հայտնեց Արեգ Գրիգորյանը:
Նրա խոսքով՝ կրթական համակարգում ռուսերենի կիրառման օբյեկտիվ պայմաններ պետք է լինեն. «Ծնողները ռուսերենի վրա փող չեն ծախսում, անգլերենի վրա են ծախսում, որովհետեւ ավելի հեռանկարային է: Գիտության լեզուն էլ անգլերենն է»:
Ինչ վերաբերում է հանրային քննարկման դրված ռուսաց լեզվի զարգացման հայեցակարգին, Արեգ Գրիգորյանի խոսքով՝ այն խոցելի է. «Անհանգստացնում է ռուսերենի առանձնացումը»:
ՀՀ Հանրային խորհրդի նախագահ Վազգեն Մանուկյանն էլ նշեց. «Ոչ մեկը չի վիճում, որ ռուսերենը պետք է սովորել, բայց եթե առանձնացնում ենք ռուսերենը, պետք է առանձնացնենք նաեւ անգլերենը: Ոչ մեկը դեմ չի ռուսերենին, մենք ԵՏՄ-ում ենք, բայց խնդիրն առանձնացումն է»:
Լուիզա ՍՈՒՔԻԱՍՅԱՆ
