ՀՀ Հանրային խորհրդի անդամների հետ քննարկման ժամանակ այսօր կրթության եւ գիտության նախարար Լեւոն Մկրտչյանն անդրադարձավ նախարարության մշակած՝ ռուսաց լեզվի զարգացման հայեցակարգին, որը հասարակության եւ փորձագետների շրջանում քննադատությունների է արժանացել:
Լեւոն Մկրտչյանը պարզաբանեց՝ ուսումնասիրությունները ցույց են տվել, որ բնական գիտությունների զարգացման համար անհրաժեշտ է օտար լեզուների ուսուցմանն ուշադրություն դարձնել ու նոր մեթոդաբանություն կիրառել հանրակրթական համակարգում, քանի որ ներկայիս մեթոդաբանությունը բավարար չէ:
Լեւոն Մկրտչյանը նշեց, որ եվրոպական երկրներում, օրինակ, օտար լեզուներ ուսումնասիրում են առաջին դասարանից, իսկ ՀՀ-ում առաջին դասարանում ուսուցանվում է միայն մայրենին: Երկրորդ դասարանից էլ սկսվում է ռուսերենի ուսումնասիրությունը. «Մասնագետները գտան, որ երկրորդ դասարանից եւս կարող է օտար լեզու ուսումնասիրվել, բայց ոչ թե տառերի ուսումնասիրման տեսքով, այլ ասենք՝ խաղերի: Այսպես առաջացավ օտար լեզուների զարգացման հայեցակարգի անհրաժեշտությունը»:
Լեւոն Մկրտչյանը նկատեց՝ նշյալ խնդրով մշակվեցին անգլերենի, ֆրանսերենի, գերմաներենի հայեցակարգերը, բայց հենց հերթը հասավ ռուսերենին, մամուլը քաղաքականացրեց հարցը. «Քաղաքականացնելու խնդիր իսկապես չկա: Արհեստական ձեւով քաղաքականացվեց նորմալ գործընթացը: Օրենքով ՀՀ միակ պետական լեզուն հայերենն է, իսկ այլ լեզուների համար որեւէ այլ հասկացություն կամ կարգավիճակ լինել չի կարող»:
Նախարարի խոսքով՝ օտար լեզվի, այդ թվում՝ ռուսաց լեզվի հայեցակարգը ենթադրում է լրացուցիչ նյութերի ուսուցում. «Կունենանք խորացված թեքումով դպրոցներ: Հայագիտական առարկաներից որեւէ ժամ չի կորում, ծանրաբեռնվածություն չի ավելանում: Այսօր շատ դպրոցներ ՀՀ օրենք են խախտում՝ ինքնագլուխ որեւէ առարկա օտար լեզվով են ուսուցանում: Սա պետք է կանխենք հայեցակարգով»:
ԿԳ նախարարի հավաստմամբ՝ ռուսաց լեզվի հայեցակարգով ռուս գործընկերներին հաճոյանալու խնդիր չունեն. «Պետք է ռուսերենին էլ հնարավորություն տանք զարգանալու, որ դառնա մեր երկրի համար կարեւոր լեզու, չէ՞ որ հայկական մշակույթը սերտ առնչվում է ռուսական մշակույթի հետ»:
Լուիզա ՍՈՒՔԻԱՍՅԱՆ
