«Սեֆիլյանի եւ մյուսների» գործով դատական նիստում այսօր ամբաստանյալներից Ներսես Պողոսյանի շահերի պաշտպան, փաստաբան Արայիկ Պապիկյանը ներկայացրեց Պողոսյանի խափանման միջոց կալանքը վերացնելու կամ այն գրավով փոխարինելու միջնորդություն: Պապիկյանը նշեց՝ ԱԺ «ԵԼՔ» դաշինքի պատգամավորները համապատասխան գրությամբ երաշխավորել են նրա պատշաճ վարքը: Դատավոր Տաթեւիկ Գրիգորյանը մերժեց միջնորդությունը, այսինքն, Ներսես Պողոսյանը կշարունակի մնալ կալանքի տակ:
Որոշումը հարուցեց դահլիճի ապակե պատնեշից այս կողմ գտնվող քաղաքացիների դժգոհությունը: Ներսես Պողոսյանը հայտարարեց, որ անժամկետ հացադուլ է հայտարարում: Դատավոր Տաթեւիկ Գրիգորյանի ասածը քաղաքացիների աղմուկի պատճառով լսելի չէր:
Դատախազ Պետրոս Պետրոսյանը դիմելով Ներսես Պողոսյանին՝ բղավեց. «Բան ունես ասելու, արա՜»: Դատավորը Պետրոսյանի հանդեպ սանկցիա կիրառեց՝ նախազգուշացման տեսքով:
Դատարանի նախասրահում դժգոհ քաղաքացիները եւ Պողոսյանի հարազատները մոտեցել էին Պետրոս Պետրոսյանին, որը պնդում էր, որ ինքն «արա» չի ասել:
Հիշեցնենք՝ Ներսես Պողոսյանին մեղադրանք է առաջադրվել այն բանի համար, որ նրանք 2015 թվականի նոյեմբերից մինչև 2016 թվականի մայիսի 18-ն ընկած ժամանակահատվածում ընդգրկված լինելով Ժիրայր Սեֆիլյանի կողմից ստեղծված, զինված-կազմակերպված խմբի կազմում, ապօրինի պահել և ձեռք են բերել հրազեն և ռազմամթերք, նպատակ ունենալով զավթել և պահել ռազմավարական նշանակության շենքեր, շինություններ: Նա կամովին հրաժարվել է հանցագործությունն ավարտին հասցնելուց:
Լուիզա ՍՈՒՔԻԱՍՅԱՆ
