Շենգավիթ վարչական շրջանի ընդհանուր իրավասության դատարանում այսօր «Սեֆիլյանի եւ մյուսների գործով» հերթական դատական նիստում որպես վկա հարցաքննվեց նաեւ Վարուժան Մելքոնյանը:
Նա դատարանին հայտնեց, որ ամբաստանյալներից ճանաչում է միայն Հովհաննես Պետրոսյանին, որի հետ ընկերական հարաբերություններ ունի: Մոտ մեկ տարի առաջ Մելքոնյանը Հովհաննեսի խնդրանքով «Ջրվեժի դաչաներից» իր վարած տաքսիով Նոր Նորք է տեղափոխել «փաթաթած տոնածառ»: Հովհաննեսի հետ վկայի առնչությունն այս դեպքով է սահմանափակվում:
Կողմերի հարցերին ի պատասխան՝ վկան հստակեցրեց, որ խոսքը հատված եղեւնու մասին է, որի ճյուղերը տեսել է. ընդ որում, եղեւնու տեղափոխումը, Վարուժան Մելքոնյանի պատմելով, եղել է ամռանը:
Վկայի ցուցմունքն այսքանով ավարտվեց: Այդպես էլ պարզ չեղավ, թե «տոնածառն» ու այս վկան ի՞նչ կապ ունեին «Սեֆիլյանի գործի» հետ:
Հիշեցնենք՝ «Հիմնադիր խորհրդարան» ընդդիմադիր շարժման առաջնորդ, Շուշիի առանձնակի գումարտակի հրամանատար Ժիրայր Սեֆիլյանը մեղադրվում է ապօրինի զենք-զինամթերք պահելու, հանցավոր նպատակներով խումբ ձեւավորելու, շենք-շինություններ զավթելու փորձի մեջ:
Լրագրողների հետ զրույցում գործով ամբաստանյալներից Ներսես Պողոսյանի պաշտպան, փաստաբան Արայիկ Պապիկյանը համոզմունք հայտնեց, որ քննչական մարմինը թվաքանակ ապահովելու համար է նման վկաների դատակոչել:
Մանրամասն՝ տեսանյութում:
Լուիզա ՍՈՒՔԻԱՍՅԱՆ
