«Մի բժիշկ է՝ ե՛ւ գլխավոր, ե՛ւ անգլուխ»,- ասում է Արմավիր գյուղի պոլիկլինիկայի միակ բժիշկը:
Արմավիրի մարզի Արմավիր գյուղի պոլիկլինիկան՝ առողջության կենտրոնը, սպասարկում է 2 գյուղի՝ Արմավիրի եւ Հայկավանի 3783 բնակիչներին: Այս պոլիկլինիկայում մարդիկ բուժսպասարկում են ստանում կիսախարխուլ շենքային պայմաններում: Այն վերջին անգամ վերանորոգվել է 2006 թվականին, այն էլ՝ թեթեւ կոսմետիկ:
Պոլիկլինիկայի միակ բժիշկն ու գլխավորը՝ Անահիտ Տեր-Հարությունյանը, «Առավոտի» հետ զրույցում ասում է՝ շատ կուզենային շենքը վերանորոգվեր, ամեն անգամ խոստումներ են լինում, բայց այդպես էլ խոստումը չի կատարվում: Նեղ մասնագետներ պոլիկլինիկայում չկան, Տեր-Հարությունյանն ասում է՝ ինքը ընտանեկան բժիշկ է, նեղ մասնագետների գործն էլ է ինքն անում, լուրջ միջամտությունների դեպքում ուղեգրում է Արմավիր քաղաքի պոլիկլինիկա, որտեղ զննում են հիվանդին, ախտորոշումը տալիս ու ուղարկում Տեր-Հարությունյանի մոտ՝ բուժման:
Գլխավոր բժիշկն ասում է, որ մանկաբույժի խիստ կարիք ունեն: Նկատեցինք՝ պոլիկլինիկայում գինեկոլոգիական աթոռ կար: Տիկին Տեր-Հարությունյանն ասում է. «Գինեկոլոգ չունենք, բայց որ պետք է լինում, ես եւ մանկաբարձը նայում ենք: Դե պապ-քսուք ենք վերցնում, այլ միջամտություններ չենք կարող անել, ուղարկում ենք Արմավիր քաղաք: Իսկ հղիների մեծ մասն էլ հանգիստ գնում է Երեւան»: Սրտաբանի գործն էլ է Տեր-Հարությունյանն անում, հպարտությամբ ասում է՝ ԷԿԳ ունենք՝ (էլեկտրակարդիոգրաֆ) սարքավորում. «Դե դա էլ եմ ես անում: Ամբողջ մարզում 2 լոր-բժիշկ կա, այլ կենտրոններում են նստում»:
Պոլիկլինիկայի փայտի վառարանն է
Ծանր դեպքերում էլ, ըստ բժշկի, շտապօգնություն են կանչում, բուժքրոջն էլ դնում է հիվանդի հետ եւ ուղարկում, բժշկի խոսքերով ասած՝ շրջկենտրոնի հիվանդանոց: Ամբողջ պոլիկլինիկայում ջրի մեկ ծորակ է, ջուրն էլ՝ շուրջօրյա չէ, այսպես ասած՝ ժամով են տալիս: Ջուրը մեծ տարայի մեջ հավաքում են, հետո դա օգտագործվում է լաբորատորիայի գործիքները լվանալու համար: Այդ ջրի «բաքն» էլ ծորակ չունի, գյուղական հին ձեւերով են ջուրն օգտագործում՝ ձեռքով սեղմում են փոքրիկ տարան ու կաթիլ-կաթիլ ծորացող ջրով գործիքները լվանում: Գլխավոր բժիշկն ասում է. «Հետո գործիքները ստերիլիզացիա ենք անում, կան, որ սպիրտի մեջ ենք դնում: Մաքրության խնդիր չկա, ջրի տարան էլ 10 օրը մեկ մաքրում ենք»:
Այս պոլիկլինիկայում ջեռուցում էլ չկա, մի փոքր փայտի վառարանով են տաքացնում տարածքը:
Պոլիկլինիկայի բյուջեն 13 միլիոն դրամ է, այն բաշխվում է 11 աշխատակիցների միջեւ ու կոմունալ ծախսերին է ուղղվում: Ամբողջ անձնակազմն էլ այս մեկ բժիշկն է, 6 բուժքույրերը, 1 լաբորանտն ու համակարգչային 1 օպերատորն ու հաշվապահը:Գյուղացիները մեզ հետ զրույցում ասում են՝ հաճախ ոչ էլ դիմում են գյուղի պոլիկլինիկա, միանգամից Արմավիր քաղաքի հիվանդանոց են գնում. «Տեղեկանքի-բանի համար գնում ենք պոլիկլինիկա, շատը մեծերն են էնտեղ գնում»: Պոլիկլինիկան համայնքային ոչ առեւտրային կազմակերպություն է, այսինքն՝ գյուղապետարանի ենթակայության տակ է: Արմավիրի գյուղապետ Ռաֆիկ Մարգարյանից «Առավոտը» փորձեց պարզել՝ արդյոք իրեն չի՞ մտահոգում, որ իր ընտրողները բուժսպասարկում են ստանում ոչ պատշաճ շենքային պայմաններում: «Հըմի մենք հնարավորություններ չունենք: Ուրիշ գյուղեր սկի էդ էլ չունեն: Ո՞ր պոլիկլինիկան է դրանից լավ վիճակում որ»: Հետո մանկաբույժ ունենալու մասին էլ այսպես է արձագանքում գյուղապետը. «Չկա՞ գյուղում մանկաբույժ»:
Արմավիրի փոխմարզպետ Լարիսա Մուրադյանն էլ մեզ հետ զրույցում ասում է՝ մարզում կան ամբուլատորիաներ, որտեղ ավելի շատ բնակչությանը 1 ընտանեկան բժիշկ է սպասարկում. «Ամեն ընտանեկան բժշկի սպասարկման առավելագույն թիվը 3500 բնակիչ է: Ոչ մի անգամ խնդիր չի եղել, եւ ոչ մի բնակիչ չի բողոքել»: Մեր դիտարկմանը՝ կառավարության որոշմամբ ընտանեկան 1 բժշկի սպասարկման առավելագույն թիվը 2700 է, փոխմարզպետն ասում է. «Ես չգիտեմ, դե երեւի մեր գործակալությունը 2700-ի համար կվճարի, մնացածի համար՝ 50 %-ի չափով»: Ապա տիկին Մուրադյանն անդրադառնում է բժիշկների պահանջարկին. «Մանկաբույժ անգամ տարածաշրջանում չկա, երբ այդ ֆակուլտետը փակվեց, մենք այդ տարիներից մանկաբույժի խիստ կարիք ունենք: Իսկ ընտանեկան բժիշկը ե՛ւ սրտաբանական, ե՛ւ էնդոկրին, ե՛ւ նյարդաբանական, ամեն ուղղությամբ վերապատրաստված է, եւ ինքն է սպասարկում: Էդ ո՞ր մի գյուղական ամբուլատորիայում նեղ մասնագետներ կան»: Բուժսարքավորումների մասով էլ փոխմարզպետը վստահեցնում է՝ եղածը բավարար է:
Շենքային պայմանների բարելավման մասին էլ փոխմարզպետը հավաստիացնում է. «Մարզի 52 գյուղական ամբուլատորիաներից 10-ը վերանորոգման կարիք ունի, դրանք մտել էին Համաշխարհային բանկի վարկային ծրագրում, եւ ծրագիրը եթե շարունակեր գումարներ տրամադրել, Արմավիրը մտնում էր առաջիկա 3-ի մեջ: Հիմա ոչ համայնքը եւ ոչ էլ պոլիկլինիկան գումար ունի: Եթե ծրագրեր, ներդրողներ լինեն՝ Արմավիրը կներառենք»:
ՆԵԼԼԻ ԲԱԲԱՅԱՆ
«Առավոտ» օրաթերթ
28.09.2017
