«Ժողովրդի» տեղեկություններով՝ «Հայբուսակ» համալսարանը հայտնվել է իրավապահների ուշադրության կենտրոնում, եւ ըստ նույն աղբյուրի, կասկածներ կան, որ բուհը ոչ օրինական ճանապարհով և ոչ օրինական փաստաթղթերի հիման վրա օտարերկրյա քաղաքացիներ է ընդունել:
Aravot.am-ը թեմայի վերաբերյալ մեկնաբանություն խնդրեց Երևանի Հայբուսակ համալսարանի նախկին ռեկտոր, Կրթության Միջազգային Ակադեմիայի (որի կազմի մեջ մտնում է նաև Հայբուսակ համալսարանը) նախագահ Անահիտ Հարությունյանից:
«Այս երկու օրերին շրջանառվող լուրը, թե «Հայբուսակը» հայտնվել է իրավապահների ուշադրության կենտրոնում գրեթե կապ չունի «Հայբուսակի» հետ: Այո, մենք ՀՀ քննչական կոմիտեին որոշակի տեղեկություններ ենք տրամադրել, բայց դրանք ոչ թե մեզ, այլ տարիներ առաջ մեզ մոտ սովորած օտարազգի ուսանողին են վերաբերվում: Անկեղծ ասած, այդ ուսանողի անունն էլ չեմ հիշում այս պահին: Իսկ այն ինչ ակնարկվում է մամուլում, մեզ հետ կապ չունի: Եթե որեւէ այլ տեղեկություն ունենանք, խոստանում եմ, որ անպայման կհայտնենք հանրությանը, եթե այդքան հետաքրքրում է»,-ասաց Կրթության Միջազգային Ակադեմիայի նախագահը:
Գոհար ՀԱԿՈԲՅԱՆ
