Այսօր կառավարությունը հաստատեց եկող տարվա` 2018-ի բյուջեի նախագիծը: Այն վարչապետին կառավարության նիստում ներկայացրեց Ֆինանսների նախարար Վարդան Արամյանը` նշելով, որ կառավարությունն իր կանխատեսումներում բարձրացրել է տնտեսական աճի ցուցանիշը. «2017 թվականի բյուջեով մենք ամրագրել էինք 3.2 % տնտեսական աճ, բայց տնտեսական ակտիվության ցուցանիշը, որը ներկայումս 5.5 % է, բոլոր ճյուղային զարգացումները փաստում են, որ մեր տնտեսական աճը կգտնվի 4-4.8 տոկոսի միջակայքում: Եվ այդ հենքի հիման վրա մենք բարձրացրել ենք գործող սպասումները 4.3 տոկոս այս տարի: Մյուս տարվա համար մենք կանխատեսում ենք 4.5 % տնտեսական աճ»:
Պարոն Արամյանի խոսքով, սեկվեստորի մասին խոսակցություն ընդհանրապես չկա. «Միջազգային կառույցները, այդ թվում՝ վարկային կառույցները աճող պարտքի ֆոնի վրա պահպանել են մեր ռեյտինգը, հեռանկարը նույնիսկ չեն էլ փոխել: Բարձր են գնահատել այն շրջանակը, որը նախագծվել ու իրակամացվում է 2017 թվականին»:
Ըստ ֆինանսների նախարարի, եկող տարվա բյուջեում ավելացրել են պաշտպանական ոլորտի ֆինանսավորումը: Նախարարը նաեւ ասաց, որ 2018-ին ծրագրել են 1 տրիլիոն 307 մլրդ դրամի եկամուտներ, իսկ բյուջեի եկամուտները կաճեն 100 միլիարդով, որը կլինի հարկային եկամուտների հաշվին:
Ինչ վերաբերում է բյուջեի դեֆիցիտին, որը ՀՆԱ-ի մեջ կկազմի 2.7 տոկոս, Վարդան Արամյանը կառավարության նիստից հետո, պատասխանելով լրագրողների հարցերին ասաց, որ հնարավոր է այն փակելու համար պարտք վերցնենք:
Մանրամասները` տեսանյութում
Լուսինե ԲՈՒԴԱՂՅԱՆ
