«Ընդհանրապես, անհրաժեշտ է քննարկել այն, ինչը քննարկվում է եւ պատրաստ է քննարկման։ Իսկ եթե տարբեր անձանց կողմից հնչած տարբեր գաղափարների հավաքածուի վերաբերյալ քննարկում է իրականացվում, հետո դա սկսում է քննադատվել, ես չգիտեմ, թե ի՞նչ պետք է ես ներկայացնեմ»,- այսօր լրագրողների հետ զրույցում ասաց ՀՀ արդարադատության նախարար Դավիթ Հարությունյանն`անդրադառնալով «Տեղեկատվության ազատության մասին» օրենքի նախագծին:
Հիշեցնենք, օրերս քննարկում էր կազմակերպվել, որտեղ ներկայացված նախագիծը, որն իբր առաջարկում է արդարադատության նախարարությունը, բուռն քննարկման եւ քննադատության արժանացավ: Նախագծի «աշխատանքային» կոչված տարբերակի շուրջ ծավալված քննարկման ընթացքում լրագրողական կազմակերպությունների ներկայացուցիչները նախագծում տեղ գտած փոփոխությունները որակեցին «աննախադեպ խայտառակություն»: Այդ նախագծում տեղ են գտել այսպիսի դրույթներ, որ օրինակ, մինչև 50 աշխատակից ունեցող պետական հիմնարկները եւ կազմակերպությունները, համայնքային կազմակերպությունները, բյուջեներից ֆինանսավորվող կազմակերպությունները եւ հանրային նշանակության կազմակերպությունները կազատվեն տեղեկատվություն տրամադրելու պարտականությունից: Գյումրիի «Ասպարեզ» ակումբի նախագահ Լևոն Բարսեղյանը նկատել էր, որ եթե «Տեղեկատվության ազատության մասին» օրենքը փոփոխվի, հարցումների 90 տոկոսը մերժվելու է:
Այդ տարբերակը քննարկման ժամանակ ներկայացրել էր «Ինֆորմացիայի ազատության կենտրոն» կազմակերպության ներկայացուցիչ Լիանա Դոյդոյանը եւ ասել, որ նախարարությունն այն ուղարկել է իրենց կազմակերպությանը` ծանոթանալու եւ կարծիք հայտնելու համար:
Դավիթ Հարությունյանը «անհայտ ծագումնաբանությամբ» որակեց այդ փաստաթուղթը։ Ի դեպ, քննարկման ժամանակ, նախարարության ներկայացուցիչը եւս հրաժարվել էր`ասելով, որ իրենք տեղյակ չեն նման տարբերակից:
Իսկ «Տեղեկատվության ազատության մասին» օրենքի բարելավման ուղղությամբ, ըստ նախարարի, աշխատանքներ են տարվում. «Հենց մոտեցումները պատրաստ լինեն, դրանք կներկայացվեն հանրությանը, հատկապես լրատվամիջոցներին, որոնք տեղեկատվության վերաբերյալ հարցերի առաջին պահանջատերն են»:
Նախարարն ասաց, որ աշխատանքային խմբում հնչել են տարբեր առաջարկներ, որոնց մի մասն ի սկզբանե անընդունելի են անձամբ իր համար, ինչպես նաեւ վերոնշյալ սահմանափակումը, բայց քանի որ առաջարկները հնչել են, դրանք ուղղակի արձանագրվել են, մեկտեղվել, որպեսզի քննարկվեն: Իսկ դա չի նշանակում, որ իրենք այդ ամենն առաջարկել են հանրային քննարկման:
Մանրամասները`տեսանյութում
Նելլի ԳՐԻԳՈՐՅԱՆ
