«Պատանի լրագրողների» դպրոցում տեղի ունեցած 22-ամյա բժիշկ Լեւոն Սահակյանի սպանության գործով այսօրվա դատական նիստը տեղի չունեցավ՝ գործով վկա Գեւորգ Երիցյանի չներկայանալու պատճառով:
Չնայած նախորդ դատական նիստին դատարանն այս վկային բերման ենթարկելու որոշում էր կայացրել, բայց նրան չէին կարողացել բերման ենթարկել: Հաջորդ դատական նիստը նշանակվեց հոկտեմբերի 13-ին:
Հիշեցնենք, որ 2016թ. հոկտեմբերի 19-ին «Պատանի լրագրողների» դպրոցի տնօրեն Վահան Ղազարյանը եւ Լեւոն Սահակյանը վիճել են վերջինիս նշանածի աշխատավարձը չվճարելու պատճառով: Լեւոնի նշանածն աշխատելիս է եղել Վահան Ղազարյանի մոտ: Դեպքի օրը Վահան Ղազարյանը 22-ամյա երիտասարդին զանգել եւ կանչել է դպրոց՝ նշանածի աշխատավարձը տալու համար, սակայն, նրանց միջեւ վիճաբանություն է սկսվել, որից հետո սրտի եւ թոքի վնասվածքներով Լեւոնը տեղափոխվել է հիվանդանոց ու այնտեղ էլ մահացել:
Արփինե ՍԻՄՈՆՅԱՆ
