Փոխոստիկանապետ Հունան Պողոսյանն այսօր Պետաիրավական հարցերի հանձնաժողովի նիստում ներկայացրեց «Թմրամիջոցների, հոգեմետ նյութերի եւ դրանց պրեկուրսորների (նախանյութերի) նմուշների հանձնման կարգի մասին» համաձայնագիրը վավերացնելու մասին նախագիծը:
Նա քննարկման ժամանակ հետաքրքիր տեղեկություններ հաղորդեց պրակտիկ աշխատանքից. «Մի քանի դեպք ունենք մեր աշխատանքից՝ երբ որ թմրամիջոցների մի խմբաքանակ առգրավում ենք, հասկանում ենք, որ մեր տեղացի մի քանի, այսպես ասած, «քիմիկոսները» նույնիսկ սիրողական մակարդակով բերում են եւ մի այլ բաղադրություն են խառնում՝ կոսմետիկական որեւէ նյութ, կամ խոտի ինչ-որ տեսակ, նույնիսկ թեյ են խառնել եւ ստացվում է այլ բան: Մեր փորձագիտական համապատասխան լաբորատորիան փորձաքննություն իրականացնելիս փչանում է: Լուրջ սարքեր ունենք, որոնք լուրջ փչանում են եւ դրանք վերականգնելու համար դիմում ենք մեր գործընկերներին, վերջին անգամ դիմել ենք ՌԴ-ի եւ Չինաստանի մեր գործընկերներին»:
Հունան Պողոսյանն ասաց, որ համաձայնագիրը կօգնի, մեզ ձեռնտու է բոլոր իմաստներով. «ՀԱՊԿ-ում Բելառուսը, ՌԴ-ն լավ դիրքերում են: Միջինասիական հանրապետություններում չարիք է դարձել թմրամիջոցների տարածումը, հատկապես այն երկրները, որոնք սահմանակից են Աֆղանստանին, մեր երկիրն էլ տարանցիկ կարող է լինել: Որքան դեպքեր կան, որ մենք չենք հայտնաբերում, երեւի թե օպերատիվ հմտությունները բավարար չեն»:
Փոխոստիկանապետը նշեց, որ հայտնաբերված դեպքերի վերլուծությունը ցույց է տալիս, որ մեծ խմբաքանակները, որպես կանոն, գալիս են՝ հետագայում տարանցիկ ճանապարհով անցնելու եւ այլ երկրներ տեղափոխելու համար. «Մեր շուկան իրենց բացարձակ չի հետաքրքրում: Գիտեք, խնդիր է սինթետիկ թմրամիջոցները, մասնավորապես, «սպայս» կոչվածը»:
Համաձայնագիրը դրական եզրակացություն ստացավ հանձնաժողովում եւ առաջիկա քառօրյայում կքննարկվի:
Հռիփսիմե ՋԵԲԵՋՅԱՆ
