Մի քանի օր է՝ Գյումրու կենտրոնական փողոցներում ակտիվ շինարարական աշխատանքներ են ընթանում. շինարարները գիշեր ու ցերեկ, նույնիսկ անձրևային եղանակներին չեն դադարեցնում աշխատանքները, որպեսզի կարողանան հոկտեմբերի 1-ին՝ Գյումրու տոնակատարությանը բարձր մակարդակով ընդունել նախագահ Սերժ Սարգսյանին։
Արդեն երկու շաբաթ է՝ Գյումրիում աշխատում են նախագահի արարողակարգի ներկայացուցիչները, հաճախակի են Գյումրի այցելում տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն ու քաղաքաշինության պետական կոմիտեի նախագահի տեղակալ Արմեն Ղուլարյանը։ Վերջիններս վերահսկում են Գյումրու պատմական կենտրոնում գտնվող Ռուսթավելի փողոցի շինաշխատանքները. հոկտեմբերի 1-ին մտադրված են մասամբ բացել վերանորոգվող փողոցը։
Կրկին վերանորոգում են Քըրք Քըրքորյանի անվան ճեմափողոցը, հիշեցնենք, որ Հռոմի պապի այցին ընդառաջ քաղաքի բյուջեից թեև մեծ գումար՝ մոտ 19 միլիոն դրամ էր ծախսվել այս փողոցի սալապատման համար, սակայն ձնհալի հետ «հալվել էին» նաև ճեմափողոցի թանկարժեք սալիկները։ Այժմ քրտնաջան աշխատանք է տարվում նաև ճեմափողոցի այն հատվածում, որտեղ գտնվում է Գյումրու երիտասարդական պալատը։ Բանն այն է, որ նախագահը պիտի այցելի երիտասարդական պալատ՝ մասնակցելով արհեստների փառատոնի։
Հոկտեմբերի 1-ին բացվելու է նաև Գյումրու մանկապատանեկան արվեստի պալատը։ Հիշեցնենք, որ քաղաքային բյուջեից 8 միլիոն դրամ է ծախսվելու Գյումրու օրը նշելու համար։
Նունե ԱՐԵՎՇԱՏՅԱՆ
